Pathianni zanah 'Manchester Derby'
Ṭhenawm bengchheng tia sawi ṭhin kha tun dinhmunah chuan team ṭha leh hlauhawm zawk an ni tawh a, hmanlai ni loin tunlai kan sawi a nih chuan Manchester khawpuia club ṭha ber chu 'United' ni loin 'City' zawk an ni.
Manchester United ṭantute erawhin engtikawng mahin Manchester City hi an dah chungnung thei rih lo - Pathianni zan dar 9:00 hian Premier League khel turin Old Trafford-ah Citizens hi an lo mikhual dawn, hnehna hlado chham khum ngei an tum ang.
Man United fiahna
Tun thlatir khan Old Trafford-ah Man United hian Brentford an hneh lo teuh hle, hun tawp dawna Scott McTominay goal hmanga si phurh an sut bakah chakna goal a khung bawk, chak lo ni se la Erik ten Hag hi an manager a ni chhunzawm tawh kher lo mai thei.
Brentford an hneh hnuah Sheffield United leh FC Copenhagen te an hneh leh tawh, an boruak a ṭha ta hle. Season bul an ṭan fuh tawk lohna kha an siamṭha mek a, an captain hlui Harry Maguire a khelh ṭhat bawk avangin an phur thar hle.
Dutch manager Ten Hag leh a nauten beiseina thar an nei a, chutihrualin an indinthar tak meuh em, tih erawh fiah a la ni lo. Man United tan chuan Man City hi fiahna dik tak a ni dawn, an paltlang zo lo a nih chuan an manager dinhmun thlengin a derthawng lehin a rinawm.
Man United tana thu lawmawm pakhat chu Casemiro a inlan theih a rinawm. Brazil international hi ram tana a fehchhuahna lamah a inhliam a, an match hnuhnungah a tel thei lo - Citizens a hmachhawn a nih chuan Rodri nen chungnung zawk nih an inchuh ang.
Lisandro Martinez leh Luke Shaw te an la hliam, tlarhnung laiah Harry Maguire leh Raphael Varane te an inkawp leh ang. England international Maguire hi captain nihna an hlihsak hial tawh, chhuak tura an nawr - mahse dinhmun ṭha chang tura tho chhuak leh mek a ni.
Pep-a City
Manchester City manager Pep Guardiola-a'n khelh dan phung duhdan leh nghet bik a nei ṭhin a, season hmasa an hlawhtlin theih nan Erling Haaland chu engkima an engkim a ni, kuminah erawh Haaland chauh ni loin hmanraw hrang hrang a hmang.
Hliam vangin Kevin de Bruyne an la chhawr thei lo a, hei hian manager lu pawh a ti hai ve hle ang tih a chiang. Haaland chauh ni loin Julian Alvarez chu an khingpuite tana ven ngun ngai bik a ni mek, tun ṭumah pawh hian Haaland nen an inkawp leh a rinawm.
Spanish manager hian tlarhnungah emaw, a lai leh hma lamah emaw eng emaw thil danglam pakhat siam tel a ching ṭhin. Tun hnai an match hnuhnung pahnihah Jeremy Doku a hmang ṭangkai viau - zaninah erawh an khelh dan a siksawi leh daih mai thei.
Phil Foden hi Man United laka hattrick siam tawh a ni a, en-kan a harsain a rinawm. Jack Grealish pawh inkhel boruak sang zo tak a ni a, anni pahnih hian Haaland leh Alvarez te an thlawp a nih chuan Man United tlarhnung tan chetsual a hlauhawm khawp ang.
Man City an ṭha tawk a, chutihrual erawh chuan tun season Premier League match vawi kua an khelh china vawi hnih tlawm tawh an ni - an bul ṭan dan hi a ṭha bik lo, champion nomawi humhim an duh a nih chuan Krismas boruak awm hmaa vawi thum tlawm chu a remchang lo ang.