Ian Wright hnaihtu Saka

Zanin dar 7:30 hian Arsenal chuan Sheffield United an lo mikhual dawn. Emirates Stadium-a inkhelah hian Bukayo Saka chuan goal a khung emaw a ṭhiante khung tur a siamsak emaw a nih chuan Ian Wright-a record nihrual theihna remchang a nei dawn.

England international Saka hian tun season Premier League match vawi riat a khel tawh a, heng zinga pasarihah hian goal a khung loh pawhin assist a nei ziah, goal leh assist a neih lohna awmchhun hi Crystal Palace lakah a ni.

Zaninah goal emaw assist emaw a nei a nih chuan - Alexis Sanchez hnuah Arsenal player zinga league match a zawna vawi sarih chhung goal emaw assist emaw nei leh thei hmasa ber a ni ang; English player zingah chuan Ian Wright (1994) hnua hetiang ti leh thei hmasa a ni hial ang.

Mikel Arteta-a'n team a dinnaah Saka hian hmun pawimawh a chang, season hmasa khan league match a khel kim vek. Tun season kal laiah pawh hliam vanga Manchester City a hmachhawn theih loh bak chu a la inkhel vek, zaninah pawh a inlan dawn tih a sawi ngam.

Arsenal manager Arteta tana buaina awm thei pakhat chu Gabriel Jesus a ni. Brazilian striker hi Sevilla an hneh ṭumin a inhliam a, eng chena rei nge a chawlh dawn sawi theih a la ni lo, match khelh tur a tam chhoh dawn avangin a chawlh rei a ngai a nih chuan a nghawng a na thei ang.