El Clasico - Barca nge Real ropui zawk dawn?

Zanin dar 7:45 hian football khawvela inkhel ngaihven hlawh ber pawl pakhat chu khelh a ni dawn a, chu chu 'El Clasico' an ti - La Liga-ah champion lai Barcelona chuan an hmelma kumhlun Real Madrid an mikhual dawn a, Spain chuan khawdang an hawi lo ang.

Real Madrid hian tun season-a league match 10 an khelh tawhah point 25 nei mekin, hmahruaitu an ni a, pathumna Barcelona hian an khelh zat ang tho khelin point 24 an nei thung.

Team pahnih inthlauhna hi point khat chauh tihna a ni a, zaninah intlansan an tum ve ve dawn - team pahnih aia match khata khel tlem Atletico Madrid an la awm ve cheu a, anni hian point thum chiahin Real an phak lo.

Table-a pahnihna Girona pawh hian match 10 aṭangin Real point hmuh ang zat tho an hmu a, tuna a lan dan chuan season dang aiin nomawi beisei ngam an tam - zaninah Barca leh Real tan chak a pawimawh lehzual tihna a ni tel nghal.

Real buaina Bellingham!

Tun nipui transfer-a fuh bera chhal ngam chu Real Madrid-in Jude Bellingham an chang hi a ni a, English midfielder hian inelna hrang hrangah match 12 khela goal 11 khungin, assist vawi thum a nei der tawh - zaninah erawh Real tibuaitu a ni tlat.

Zinedine Zidane nen meuha khaikhin hlawh Bellingham hi Champions League-a Sporting Braga an hneh ṭumin a inhliam a, niminah training zawm mah se El Clasico-ah a inlan theih dawn leh dawn loh a la chiang lo.

Bellingham chet ṭhat hi Real tan chanchin lawmawm a nih rualin, amahah team an innghat lutuk a, hei hi buaina pakhat a ni ve thei. Vinícius Junior-a'n ngai awh chho ṭan mah se, tun season-ah match kua aṭangin goal thum chiah a la khung.

Braga laka goal khungtu Rodrygo-a'n tun season-ah goal hnih bak a la khung lo bawk a, Bellingham vul laiin Real player beiseiawmte an bo - Bellingham inlan lo ta se, Real hi enge an an ang, tih chu inzawh hial a ngai ta.

Chhungkaw buaina

Real-in league-ah hma hruai mek mah se an chhungkaw buaina a la reh lo. Coach Carlo Ancelotti hian season tharah Santiago Bernabeu a chhuahsan tawh dawn a, Brazil national team a enkawl tawh dawn niin an sawi.

Hei vang hian Ancelotti hian a naute hlimna a ngaihtuah tawk lo em ni, tih sawi theih a ni a, international break laiin player engemaw zatin Ancelotti chunga an lungawi lohna an sawi chhuak.

A laia hun hmantir ṭhin Rodrygo chuan mual ding lam sira awm nuam a tih thu a sawi a, full back atana chhawr ṭhin Eduardo Camavinga-a'n central midfield-a khelh a duh a, centre back-a dah leh ṭhin Aurelien Tchouameni pawhin midfield-a khelh a duh.

Luka Modric pawhin tun hnaiah khelh tam a duh thu a sawi chhuak bawk a, Real tan Barca laka hnehna chang tur chuan heng boruak duhawm lo zawng zawng hi hmeh mih a ṭul.

Buai ve tho Barca!

Real tana thu hriat nuam tur chu Barcelona an talbuai ve tho hi a ni. Player ṭhangduang Pedri chu chiang takin a inlan thei dawn lo a, midfielder Frenkie de Jong leh Raphinha te zaninah an inlan loh a rinawm zawk.

Hetihlai hian October thlatir aṭanga inhliam tawh Robert Lewandowski a lo kir thei dawna sawi a awm a, Shakhtar Donetsk lakah khan lo kir thei tawh ni mah se, El Clasico atan an khek niin an sawi.

Barca hian player naupang tak tak, Marc Guiu, Fermin Lopez, Gavi, Alejandro Balde, Lamine Yamal, Pedri leh Ronald Araujo te ho an nei a, Catalan club ṭantute tan chuan club hmalam hun a him tia sawi ngam a ni hial.

Mahse, a thim zawnga thlir chuan Barca squad chhah tawk loh vang a ni pakhat a, coach Xavi-a'n a duh vang reng ni loin academy lam player a thlir nasat a ṭul - inkhel boruak sangah kum naupang player ngah ṭhat leh ṭhat loh a hriat ang.

Barca buaina

Season hmasa khan Xavi-a kaihhruaina hnuaiah Barca tlarhnung a khawng ṭha a, league nomawi an chawi chhan pawh a ni - an league match 31-naah goal 10 an chhuah ve chiah a, tun season-ah erawh match 10 an khelh aṭangin goal 10 an chhuah der tawh!

Season hmasaa Barca tlarhnung ngheh chhan langsar chu goalkeeper Marc-Andre ter Stegen a ni a, mahse, tun season-ah beisei angin German keeper a che ṭha tawk lo - Real lakah enge a an dawn, tih chu thil hmuh châkawm a ni.

Tuna Barcelona buaina langsar pakhat chu Nou Camp an sak ṭhat mek avangin an stadium hmingthang hi an hmang thei rih lo a, Estadi Olimpic Lluis Companys-ah an home match an khelh a ṭul phah. An stadium hawhah hian a tam berah mi 49,472 bak an leng lo a, mi 99,354 lenna Nou Camp nen a inang lo.

Hei bakah hian a panna a hlat tham deuh avangin stadium khat zo fans an kal thei meuh lo a, an mikhualte lakah 'Nou Camp' boruak zamawm ang kha an lo chhawp hleithei lo - Real lakah erawh stadium a khat ang tih a chiang a, Nou Camp phak lo mah se boruak siam an tum ang.