Chhun dar 12-ah ADFA First Division Final : FC Bethlehem Vs Kanan FC

Aizawl DFA First Division chu thla hnih dawn khelh hnuah vawiin hian Lammualah a hmawr bawk a ni dawn ta. Chhun dar 12:00-ah FC Bethlehem leh Kanan FC te an inkhel ang a, champion hian MPL Playoff an khel ang.

FC Bethlehem hian season liam ta khan Mizoram chhunga football inelna sang ber an khel a, an relegate. Kanan FC hi MPL Playoff hmasa ber aṭang tawh khan MPL khelh tumin theihtawp an chhuah a, an vanduai leh ṭhin. Nikum khan Kanan FC hi league round champion ni mah se semifinal-ah an chak lo - kuminah erawh nomawi chawi an tum hle.

Team ṭha Kanan

Kanan FC hi First Division club zinga club enkawl nana sum theh chhuak hnem ber zinga mi an ni a, coach tawnhriat nei ṭha Chawngthansanga'n a enkawl. Kumin hian Chawnga hian Reitlang FC leh Chanmari West-a a enkawl ṭhin H. Lallianzama a la lut a, tawnhriat nei ṭha dang Lalchhanchhuaha Jahau an la bawk.

Khelmualah erawh season liam taa an goal khung khawl Lalthuthlunga a la che reng a, captain Lalhriatpuia Jongte-in midfield a luah lum ṭha. Coach Chawngthansanga'n a player neihte a hmang thiam a, Aizawl FC leh Chanmari FC forward hlui Lalremruata pawh pressure sangah a rintlak hle.

Club president leh manager Lalramnghaka Pautu (Anghaka) chuan, "Champion ngei tumin team kan din a, First Division-ah chuan team in balance berah kan inngai. Senior coach tawnhriat ngah Chawnga'n min ho a, a hnuaiah player-ten hma an sawn. Player mal angin innghahna kan nei lo a, team angin kan khel ṭhin," tiin Vanglaini a hrilh a, champion ngei a inbeisei thu a sawi bawk.

Kanan hian league round-a an hneh loh Sihphir Venghlun hnehin final an lut a, final-a an khingpui tur FC Bethlehem hi league round-ah an hneh tawh a ni.

MPL rim nam FCB

FC Bethlehem hi season liam taa MPL khel an ni a, player inthlak hlawk mah se team angin inrintawkna an neih phah. Club enkawltuten tualchhung football an hre ṭha a, an mamawh tur player an la khawm hma bawk.

Amaherawhchu FCB hi Edgy Sports Management nen an inremna a tlawlh a, an duhthusam team an rem thei ta lo. Chutichung chuan coach Lalhriatpuia Sailo thawhrimna avangin team ṭha tak an din ta tho.

FC Bethlehem leh Kanan FC hi Joint YMA Field, Vaivakawna training ho char char an nih avangin team pahnih hi an inhrechiang a, final-ah pawh rinkai zawk sawi tur an awm lo.

FCB coach Lalhriatpuia Sailo chuan, "Inelna ṭan dawn ṭepah main sponsor (team inghahna ber tur) an inhnukdawk thut a, budget a tlem avangin kan duh ang player kan la thei ta lo. Hun chep tak karah club hruaituten theihtawp an chhuah a, hemi kawngah hian kan hruaitute bakah player-ten fak an phu hle," tiin Vanglaini a hrilh.

Hriatpuia hian 2015-16 season khan Kanan FC hi a enkawl tawh. FCB coach chuan, "Final kalkawng a hautak a, ka club hlui kan hmachhawn dawn. Theihtawp kan chhuah dawn a, final hmuhnawm tak kan lantir ka beisei," tiin a sawi.

First Division-ah entu an tam tawk ṭhin lo a, vawiinah erawh Lammual a nih bakah final a nih tawh avangin entu tam zawk awm tura beisei a ni. Nomawi inchuhna hi LPS Vision-ah tihchhuah a ni ang.