I League ṭan a ni dawn ta: Aizawl FC bul ṭanna tur Mohammedan

India rama football inelna ber dawttu I League chu vawiin aṭangin khelh ṭan a ni dawn. Kumin inelnaah hian team 13 an awm a, NorthEast aṭanga champion tawh awmchhun Aizawl FC chuan October 29, Pathianni zan dar 7:00-ah Mohammedan SC an hmachhawn ang.

Mizo club hian match khelhna tur Kolkata panin vawiin hian Aizawl an chhuahsan dawn. AFC-in home match an khelhna hmasa ber tur chu November 4, Inrinni a ni a, amaherawhchu RG Stadium artificial turf thlak a ni a, an la peih hman loh avangin sawn a ni ang.

Beiseina Thar

Aizawl FC-in 2016-17 season-a I League an champion hnuah an la champion leh lo a, an champion lai hian I League hi India rama inelna sang ber a nih avangin an nomawi chawi hi a hlu hle.

Kuminah hian Dutch manager Erol Ekbay hoin Mizo club-in inelna an hmachhawn dawn a, Mohammedan an hmachhawn hunah hian foreigner pahnih Ivan Meric leh Gustavo Claudio da Silva te chhawr theihin an awm nghal dawn.

MPL-ah Ekbay hian AFC hi a enkawl hman lo a, MPL10-ah Mizo hlangin AFC hi an inlan hrim hrim bawk. I League-ah erawh foreigner bakah state pawn player te an awm tawh thung.

Mohammedan lakah pawh hian goalkeeper Nora Fernandes, midfielder Sekh Sahil leh forward Fredshan Marshall te chu inlan thei dinhmunah an ding. Team innghahna tur erawh Mizo player-te an nih a rinawm zawk.

Tlarhnungah Lalmuanawma (Munez) leh S. Lalhrezuala te MPL-ah an pawimawh a, I League-ah pawh rinrawl an nih theih a beiseiawm. Midfield-ah Lalramsanga, K. Lalrinfela leh winger R. Lalthanmawia te hi season liam taa chhawr ngun an ni a, inrintawkna an nghah tawh khawp ang.

MPL10 top scorer ni lai Lalrinzuala chu I League-ah fiahin a awm dawn a, Serchhip tlangval chevel hmuh a châkawm tawh hle. Mizo club hi an squad a chhah avangin I League squad-ah MPL a inlan ṭhenkhat an tel pha lo a, tuna tel ho hi training-naa che ṭhate an nih hlawm avangin inelna hmachhawn turin an inpeih ang.

Mohammedan chu

Kolkata club ṭha pathum hming sawi tur a nih chuan Mohammedan SC hming hmaih a thiang lo a, Aizawl FC hmabak a harsa nghal dawn tiin a sawi theih.

Mohammedan-ah hian Mizo paruk an awm a; player ṭha tak vek an ni. Goalkeeper Lalbiakhlua, defender Zodingliana Tochhawng leh Vanlalzuidika, forward David Lalhlansanga, Samuel Lalmuanpuia leh Lalremsanga te an ni.

Calcutta Football League-ah David-a'n hming a chher a, Vairengte tlangval hi Aizawl FC chhul chhuak ni mah se tun ṭumah erawh amah chher chhuaktute goal-ah khung a tum dawn.

CFL-ah David hian goal 21 ngawt a khung a, Durand Cup-ah pawh match thum lekah goal ruk a khung. Aizawl FC tlarhnunga Mizoten David-a an hrechiang a, an dang thei ang em, tih chu hunin a hril ang.