Liverpool tan Europa League a awlsam!

Ningani zan khan European football-a club inelna sang ber dawttu Europa League-ah Liverpool an inlan a, an mikhual Toulouse chu 5-1 ngawtin an sawp.

Reds tan Diogo Jota, Wataru Endo, Darwin Nunez, Ryan Gravenberch leh Mohamed Salah ten goal khat ṭheuh an khung a, French club tana Thijs Dallinga goal khung ve chu mualpho zualpui khuhna chauh an chang.

Premier League club dang zingah West Ham United an chak zo lo a, an mikhualna ramah Olympiakos chu 2-1 in an ngam lo - Kostas Fortounis leh Angelo Ogbonna (own goal) ten Greek club tana goal khungin, Hammers tana Lucas Paqueta goal khungin awmzia a nei phak lo.

Ningani zan inkhel dangah Brighton & Hove Albion chuan 2-0 in Ajax an hneh a, English club tan Joao Pedro leh Ansu Fati ten goal khat ve ve an khung.

Hei le Liverpool

Anfield-ah Reds-in hnehna chang turin harsatna an tawk lo - minute kuana leka Jota goal hmahruai chu French club-in Dallinga hmangin sut mah se Liverpool-in na takin an chhanglet zui a, dawl zawrin Toulouse an zawr.

Endo, Nunez, Gravenberch leh Salah ten goal khat ṭheuh an khung a, Nunez hian goalkeeper thlenga a bum hnuah post pet per mah se, a per lehlam chu Gravenberch chuan goal-ah a chantir ta tho a ni.

Kum 31 mi Salah hian Liverpool tan European football-a match 70 a khelh aṭanga goal 43 a khungna chiah a ni a, Premier League club tana European football-a goal khung hnem ber Thierry Henry record (42 goals) chu a lehpel.

Reds-in hnehna an chan avangin group E-ah match thum aṭanga point kua hmuin hma an hruai mek a, knockout round an lut ngei dawn niin a lang. Jurgen Klopp-a naute hi Pathianni zan dar 7:30-ah league match khelin an inlan zui dawn a, Nottingham Forest an mikhual ang.

Brighton an chak

European football-a an chak vawi khatna ni turin Brighton chuan hnehna an chang a, an hneh hi Dutch club hmingthang Ajax ber kher an nih avangin Premier League club tan a hlu bik lehzual.

Brighton hian Pedro hmangin minute 42-naah goal hmahruai an khung a, minute 53-naah Anus Fati chuan a belhchhah leh bawk - Brighton an chak. Pathianni zan dar 7:30-ah Fulham chu league-ah an mikhual zui dawn.

West Ham-a dinhmun derthawng anga sawi David Moyes-a'n result hmangin amah sawiseltute a chhang thei lo a, Olympiakos lakah Hammers a tlawmpui - Greek club hian first half-ah Fortounis leh Ogbonna (own goal) hmangin hma an hruai.

Hun tawp nan minute thum chuah a awm tawh tihah Lucas Paquetá chuan khung ve leh mah se a team kaihharh nan a tlai hret tawh a, Pathianni zan dar 6:30-a Everton nen league match an khelh hunah Moyes-a'n result hmanga a hmai bal a phih fai a ṭul.