Alcaraz tan season a la tawp lo

Carlos Alcaraz chu hun tepter tawh takah Swiss Indoors championship aṭangin a inhnukdawk - a inkhelh theih loh chhan hi hliam vang nia sawi a ni. Spanish tlangval hian tun season chhung ngeia inkhelh leh hman erawh a la tum.

Swiss Indoors buatsaihtute sawi dan chuan Alcaraz hi a tihrawl a hliam, hei vanga inhnukdawk hi a ni. Tun season tawp lamah hian Paris Masters leh ATP Finals te an la khel leh dawn, tah chuan inlan theih a beisei.

Wimbledon champion lai Alcaraz chuan, "Ni tin hian ka hliam dinhmun endik a ni a, tunah inkhel turin la inpeih chiah lo mah ila hma ka sawn zel. Paris Masters bakah Turin khawpuia inelna neih turah pawh ka tel theih chu ka ring," a ti.

Alcaraz hian kuminah Masters 1000 title pahnih a la - Indian Wells leh Madrid Open lamah a hlawhtling. Cincinnati Masters final pawh a lut a, mahse nomawi inchuhna inkhelah Novak Djokovic a ngam lo.

US Open khelh zawh a nih rualin Alcaraz hian world number 1 a nihna a hloh, tunah chuan number 2 niin a chungah hian Djokovic a awm. New York khawpuia semifinal a paltlang zawh loh hnuah result duhawm tak a la nei mumal lo a ni.

Ruahman dan chuan Paris Masters hi Ocotober 28, Inrinni aṭanga khelh ṭan a ni ang. A thiam zual pariat inelna ATP Finals erawh November 12 aṭangin Italy rama Turin khawpuiah an khel dawn a ni.