England tan World Cup a tawp?

Cricket World Cup champion lai England chuan Ningani khan Sri Lanka chu wicket riatin an ngam lo a, an tan World Cup a tawp tiin a sawi theih - Three Lions hian chhiarkawp dana tlin theih dan la nei mah se, an hmabak match-a an chak vek bakah, midang puihna an la mamawh tel cheu a, thilmakah pawh mak danglam bik a thlen a ngai tawh.

Bengaluru khawpuia inkhelah England batter-ten Sri Lankan bowler-te an ngam lo - over 33.2-ah run 156 chiah siamin an out vek a, run siam hnem ber Ben Stokes chuan run 43 a tlin ve thei hram.

Sri Lanka hian over 25.4-ah an target hi an um phak fel der a, wicket hnih chiah an hloh. Sri Lanka tan run 77 siamtu Pathum Nissanka leh Sadeera Samarawickrama (65 runs) te chu a tawp thleng damin an che ṭha a, England an tawn hmaa Netherlands chiah hnehtu team hian England lakah harsatna an tawk lo.