Eniola Aluko a chawl ta

England hmeichhe team tan vawi 102 inlana goal 33 khungtu Eniola Aluko chuan inkhelh a chawlhsan thu a puang a, kum 32 mi lek nichungin a ball boot a khai fel.

Aluko hian December khan Serie A champion Juventus a chhuahsan a, England Women's Super League lamah kir leh tura ngaih a nih laiin a chawlh thu a puang ta zawk a ni. Chelsea tan pawha lo khel tawh forward chuan, "Thla ruk liam ta vel khan he thutlukna hi ka siam tawh. Football leh training hi ka ngai ang em? tih ngaihtuahin hun ka inpe a, mahse ka lung a leng tlat lo a ni," a ti!

Aluko hian Chelsea tan a khelh laiin league nomawi vawi thum a chawi hman a, FA Cup-ah vawi hnih a champion bawk. Juventus tan Serie A leh Italian Cup nomawi a chawi hman. World Cup 2015-a England pathumna nihpuitu forward chuan, "Juventus-ah pawh nomawi ka va chawi leh a, ka tan hian eng nge hmabak la awm ka hre thei lo. Thianṭha leh chhungte nena hun duhawm kan hman tur chu ka hloh mai mai niin ka hria a ni," tiin a  sawi.