East Bengal an tlawm, Bagan an chelh

Thawhlehni zan khan I League-ah inkhel pahnih a awm - Kolkata club pahnih Goa-ah an che chhia. Salgaocar-in East Bengal an hneh a, Sporting Clube de Goa-in Mohun Bagan kal tluang an chelh ding.

Tlak hlauhawma ding Salgaocar-in champion beisei ngam East Bengal 3-1 in an barakhaih a, Sporting Goa leh hmahruaitu Mohun Bagan 1-1 in an inhnehtawk.

Salgaocar damna Semboi

Tilak Maidan Stadium, Goa-a inkhelah Salgaocar tan Manipuri tlangval Thong-khosiem Haokip a langsar a, 'Semboi' tia an koh ṭhin hian goal hnih a khung.

Inkhel ṭan aṭanga minute 4-na lekah Semboi hian goal hmahruai a khung. Minute 10-naah hliam vangin Darryl Duffy lak chhuah a ni a, league match sawm a khelh tawha goal kaw khungtu striker inhliam hi Goan club mikhual leh tur Aizawl FC tan chanchin lawmawm a ni thei.

East Bengal-in minute 25-naah Ranti Martins hmangin an sut a; Goal an chhuah hnuah Goan club an hnual phah lo a, ackichand Singh-a penalty hlawh chu Calvin Mbarga-a'n a thun a, injury time-ah FPAI Young Player of the Year 2015 Semboi chuan an chak nem ngheh nan a goal hnihna a khung - Goan club-in 3-1 in chak.

Eng nge an sawi?

Salgaocar FC coach Santosh Kashyap chuan, "Inkhel bul kan ṭan ṭha a, ka naute khelh danah ka lawm em em a ni. Tun hmaa kan neih loh inlungrualna leh thawhhona ṭha kan nei a, ka naute khan 100% aia tam zawk mah an theihna an pek avangin kan chak a ni," tiin a lawm hle.

East Bengal coach Biswajit Bhattacharya chuan, "Zanin kha East Bengal player-te'n an khelh chhiat ber
ṭum a ni a, player pakhat pawh khel ṭha sawi tur ka hre lo," tiin a lungawi lo hle.

Bagan chak zo lo

East Bengal chak loh zanah Mohun Bagan-in an hmahruaina sawhnghehna hun ṭha nei mah se an hun neih an chhawr
ṭangkai thei lo a, Raju Gaikwad own goal vangin Sporting Goa chu 1-1 in an inhnehtawkpui a ni.

Minute 28-naah mikhual team tan Brandon Fernandes chuan a club hlui lamah a khung. Minute 10 a liam a, Sporting lamin an si phurh an sut - goal khungtu erawh Bagan defender Raju Gaikwad a ni. Kum 25-a upa defender hian Victorino Fernandes ball corss chu an lamah a ti lut a, February 23 AFC Cup-a Maziya R&SC 5-2 a an hneh
ṭumin India international hian an lamah a lo ti lut tawh bawk.

Mohun Bagan tan Mizo tlangval Jeje Lapekhlua chuan inkhel bul a ṭan a, season hmang ṭha tak Hnahthial tlangval hian hun tawp thlengin khelmual chhungah hun a hmang.

Sanjoy Sen thukhawchang

Mohun Bagan manager Sanjoy Sen chuan, "Kan khelh dan en chuan lungawina tur a awm lo. Mahse, khati chung chung khan chak thei kan ni a, kan hun ṭha neih kan chhawr ṭangkai thei lo a ni. Odafa Okolie kha a hlauhawm em em a, point khat kan hlawh chhuak hi kan vannei a ni," a ti.

Season hmasaa I League nomawi Bagan chawipui-tu coach chuan sawi chhun-zawmin, "Kum 10 liam ta chhunga khualmuala Bagan chet dan in thlir chuan kan che ṭha ngai lo. Season hmasa khan khualmualah point 11 chiah kan hlawh chhuak a, tunah chuan point 10 kan hlawh chhuak der tawh," tiin Aizawl FC leh Shillong Lajong an lenchilh hunah hnehna an chan ngei a rin thu a sawi lawk.