Houllier a liam ta Mittui a liam ve si lo!

Football khawvela hming dai tawh ngai lo tur Diego Maradona, Paolo Rossi leh Papa Bouba Diop-ten kum 2020-ah mual an liam a, Covid-19 vanga kum ngainatawm loh tak hi thihna nunrawng tak chuan football ngainatute tan kum ngainatawm lo lehzualah a rawn chhuah a, a ṭha lo zawnga hriatreng tur kum a ni ta. 

Mahse, a la tawk zo lo - thihnain duhtawk a nei thei lo. Football ngainatute mittui far pawh a hul hmain Liverpool coach ropui ṭhin Gerard Houllier-a banah a kai a, pialral a kaipui leh ta. Aw, thihna, a tawk tawh em em lo em ni?

Bill Shankly, Bob Paisley leh Jurgen Klopp ang emin Gerard Houllier hian Liverpool tan hna ropui thawk lo mah se vawiina Liverpool a la 'Liverpool' theih nana tha thawhhlawk a ni a, Reds fans zingah ngai hlu lo an awm lo ang. 

Houllier-a'n Liverpool manager hna a thawh ṭantirha Liverpool Echo tana assistant sports editor, tuna BBC chief football writer Philip McNulty chuan, "Liverpool-a rawn zawm hian Anfield-ah kan inhmu a, a hnu rei lo teah, 'Melwood-ah ka chhung tharte chu ka va hmu ang e,' a ti a, chu chu Liverpool a en dan a ni. A tan chuan Liverpool chu chhungkua a ni a, engtiklai pawhin Reds tana a ṭha ber a duh reng ṭhin," a ti. 

Gerard Houllier hian Liverpool coach a nih hma daih tawh khan Liverpool nen inkungkaihna an lo nei tawh. French manager hian professional angin football-a khel ngai lo a, Lille University-ah lehkha a zir laiin a pa damlohna avangin a zir chhunzawm thei lo a, zirtirtu hna a thawk zui. 

A degree hi part-time in a zo ta tho a, 1969 - 1970 inkar khan a degree ken tel angin Alsop Comprehensive School, Liverpool khawpuiah French ṭawng zirtirin hna a thawk. 

September 16, 1969 khan Liverpool khawpuia a awm laiin Merseyside club match hmasa ber chu a en a, he inkhelah hian Irish club Dundalk chu 10-0 ngawtin an sawp nghe nghe. 

Houllier hian hetihlai hian Liverpool khaw club tenau Alsop tan part-time in a khel bawk a, Liverpool-a chhuahsan hnuah Ecole Normale d'Arras school-ah kum 26 mi a nih thlengin headmaster hna a thawk zui. 

Kum 1973-ah French club tenau Le Touquet enkawlin player-manager angin a awm a, hming a chherna tak erawh kum 1976-a fifth division club Noeux-les-Mines a enkawl chu a ni - budget nei tlem tak chungin vawi thum promotion a hmuhpui a, 1982-ah RC Lens a zawm. 

Lens hi top division kaipuiin UEFA Cup hial a khelhpui a, kum 1985-ah French club ṭha Paris Saint-Germain a zawm zui. PSG tan hian a season hmasa berah hetihlaia French league sang ber Division 1-ah champion nomawi a chawi nghal a, kum 1988-ah France national team assistant manager ni turin a chhuak - Michel Platini hnuaiah a thawk. 

Kum 1992-ah France national team manager hna a thawk a, mahse, World Cup 1994 khel tura a tlinpui zawh loh hnuah Les Bleus coach aṭangin a bang a, World Cup an tlin loh chhanah hian an match pawimawha Bulgaria laka winger David Ginola tihsual chu a puh.

Houllier hian France national team-ah technical director hna a thawh chhunzawm a, World Cup 1998 an champion theih nana a tha thawh chuan fak a hlawh hle. 

July 1998-ah Roy Evans nena thawk dun turin Liverpool a zawm a, thla thum hnuah Evans a bang a, Houllier hian amahin Liverpool enkawl hna a thawk chhunzawm ta a ni. 

Liverpool-a enkawl lai hian football administrator ṭha ber pawla sawi ni ṭhin Peter Robinson nena an thawhdunna chu fak hlawh a ni a, khelmuala Liverpool a enkawl dan mai ni loin training ground leh bungrua lama hma an sawnna kawng thlenga tha thawhhlawk 

ber a ni. 

Houllier-a'n Liverpool a enkawl tirh hian player ṭha si, hlawhtlinna chang thei lo rual, an hming lema 'Spice Boys' an tih Paul Ince, Steve McManaman, Robbie Fowler, Jason McAteer leh Jamie Redknapp-te ho an awm a, mahse, Houllier hian ngaihsan ve kher a tum lo.

Club academy lam a hawi a, Jamie Carragher, Steven Gerrard leh Michael Owen-te a hmu - team boruak chhe tak a siam ṭha a, mahni tawka 'star' inti ve tak player kawl aiah discipline a thlang a, hei hi tun thlenga fak a hlawhna a ni. 

Houllier-a ropuina an sawi ṭhin chu fan-te thurawn thlenga a ngaithla peih kha a ni a, mahse, vawiina a nunna hial a tawp chhanna, lung lam na hian Reds a enkawl lai pawhin a tibuai fo ṭhin. 

October 2001 khan Anfield-a Leeds United nen an inkhelh laiin a damlo a, darkar 11 zet zai a nih hnuah doctor-te thurawn chu football hawisan a, a ngaihtuahna seng lutuk lo tura tih chu a ni - mahse, chu zet zawng Houllier tan tih theih loh a ni.

Fan-te a ngaihthlak fo bakah journalist-te pawh a ṭhian ṭhaah a siam a, an hun pawimawhah chuan lawmpuina pangpar leh thil pek nen duhsakna a hlan fo ṭhin.  

Mahse, 2003-04 season tawp lamah Reds-in an ban a, a duh em em league nomawi a chawipui ta lo - ban a nih hian Liverpool chu league-ah palina an ni a, Champions League khel turin an tling. 

Liverpool-in 2005-ah Champions League nomawi ropui takin an chawi a, Rafael Benitez-a'n fak a phu tluk zetin Houllier hming lam hmaih a thiang lo - hmangaih leh duat taka a enkawl, a siam len tih ngam player tam zawk chu Benitez-a player pawimawh an ni tlat. 

Houllier-a'n Merseyside club-a enkawl chhungin nomawi liantham panga; League Cup (2), FA Cup (1), UEFA Cup (1) leh UEFA Super Cup (1) nomawi te a chawipui a, 2000-01 season-ah phei chuan cup treble champion niin  FA Cup, League Cup leh UEFA Cup-ah te nomawi an chawi. 

Merseyside club-a chhuahsan hnuah French club ṭha Lyon-a enkawl zui a, Ligue 1 (2) leh French Super Cup (2)-ah te nomawi a chawipui leh thei a ni. 

Liverpool hnuah Lyon leh Aston Villa a enkawl a, hemi hnu hian Red Bull-ah head of football leh Lyon leh OL Reign hmeichhe team-ah technical director hnate a thawk - tunah erawh rei tak a lo buai tawhna, lung lam ṭhat lohna chu a thlah fel ta a, Houllier a dam ta. 

Ka manager hlui Gerard Houllier liam thu ka hriat chuan min ṭhawng takzet. Kei leh ka career tana a hnathawh zawng zawng kha ka theihnghilh thei tawh lo ang. Hahdam takin chawl ang che, Boss.

- Steven Gerrard (Liverpool captain atana Gerrard ruattu chu Houllier a ni)

Mang duhawm min man tir a, zai hla min rem saktu. Muttui le, Boss. 

- Robbie Fowler

Gerard Houllier chanchin ka hriat chuan minti hrehawm takzet a ni. Liverpool-a a lo kal theihna tur chungchang sawiin thla hmasa lawk khan kan inbia asin maw le. Ka thinlung zawng zawngin ka hmangaih a, player ka nihna piahlamah ka mimal nun thlengin 

min thlaksak a, Liverpool tlu tawh chu nomawi chawi turin a dinthar leh bawk. Chawl hahdam ang che, boss. 

- Jamie Carragher

Gerard Houllier, ka boss hlui awm tawh loh thu ka hriat avangin ka thinlung a kehsawm vek a ni. Manager ropui leh midang ngaihtuah em em rengtu a ni. 

- Michael Owen

Ava pawi tak em! Gerard Houllier a awm tawh lo. Football khawvela thluak fing, midang ngaihsaktu leh hmangaihtu. Gerard, chawl hahdam rawh. 

- Gary Lineker