Serpents-in Ryders hneh

Zarkawt Serpents-in Mizoram Super League season 2-ah a vawi khat nana hnehna an chang a, Chaltlang Ryders an hneh zanah Sahil Sharma a che ṭha hle.

Thawhlehni zan Hawla In-door Stadium, Republic Veng-thlanga inkhelah Serpents hian 79-74 in hnehna an chang a, Ryders-in MSL2 match hnih an khelh tawh
aṭangin chak hmel an la hmu ve lo.

An match hmasa zawka Khatla TBL hneh lo tu Chaltlang Ryders hian a vawi khat nan chak ni hmel an hmu ve dawnin lang mah se point li laia hma an hruai fal tawhna an chhawr ṭangkai thei lo a, hun pawimawhah power forward Richard Hmingliana chuan player puitling lo zia a lan tir chu an tuar tel bawk.

Serpents chakna kawnga thawhhlawk tak Guwahati player Sharma hi an match hmasa berah a fitness ṭha tawk lo deuhin lang mah se a match hnihnnah erawh inngahna tham a nih zia a pho lang a, point 28 zet a score bakah assist vawi 18 lai a nei thei bawk.

Ryders tan Rachit a che ṭha chhunzawm a, VR4 aṭanga an lak H. Lalthangliana hmuh-nawm mah se Serpents player Sharma leh Lal-ramropuia (20 pts) te an dan theih loh avangin match zawnin an chak lo.

Chaltlang Ryders hian MSL season khatnaah khan vawi khat chiah chak ni hmel an hmu a, an hneh chhun chu Serpents hi an ni. MSL1 a an hneh tawh tun season-ah an hneh loh tak avangin chak ni hmel an hmu thei ang em tih chu zawhna lian tak a ni.

Eng nge an sawi?

Zarkawt Serpents manager Dino Laldin-puia Chhangte chuan, "Vikings kan khelh ṭuma kan chetsual ang khan a tawp lamah khan kan buai leh lek lek a, mahse tun
ṭumah erawh kan vanneih ni a inherchhuak ve ta. Veng mipui min ṭantute hmaah hnehna kan chang thei hi kan lawm hle," tiin Vanglaini palai a hrilh.

An chak loh chungchang Vanglaini palai hnenah sawiin Chaltlang Ryders coach Peter Lalrintluanga chuan, "Third division, second division leh first division thlenga sulhnu nei ṭha tawh kan ni chunga MSL bika result kan nei ṭha thei lo hi a makin hriatthiam a harsa a, hun pawimawh a che fuh turin mimal tinin kan rilru kan siam a ṭul," a ti.

Hmabak

Team pahnihte hian Zirtawp-ni hian MSL2-a an match thum-na an khel leh ve ve dawn a, Serpents hian champion lai Khatla TBL an hmachhawn leh ang a, Ryders hian Tuikual South an hmachhawn thung ang.