Zanin dar 8:00-ah Vikings vs BCA

Mizoram basketball ngainatute tan zanin hian Hawla Indoor Stadium, Republic Vengthlang pan a fuh ang. Mizoram Super League Season 2-a team ngaihven hlawh pahnih Mission Veng Vikings leh Zarkawt BCA te zan dar 8:00-ah an inkhel dawn.

Chak leh chak lo

MSL2-ah Mission Veng Vikings hian an match hmasa berah Zarkawt veng team pakhat zawk Serpents an hneh tawh a, hetih lai hian BCA erawh team intuai thar Tuikual South lakah an chak lo thung. Team pahnih tan zanin hi fiahna a ni ang.

BCA hian an match hmasa zawkah hnehna chang lo mah se MSL1 lama vawi hnih an lo hneh tawh Vikings hi an huphurh dawn lo a, chutih laiin boruak ṭha mek Vikings pawhin an boruak ṭha chhawn nun theih an inbeisei dawn a, an record ṭha lo thai bo an duh dawn avangin inkhel a hmuhnawm ang.

Hliam leh dam

Vikings lam hian dam lohna vangin point guard Lalnunpuia an chhawr thei dawn lo a, forward Lalrempuia Vaiphei chu a dinhmun a chiang lo bawk. He tih lai hian an khingpui tur BCA erawhin hliam an nei lo a, an ṭhat dan berin inkhel an hmachhawn thei dawn.

Zarkawt BCA coach R. Liansangpuia chuan, "Kan inkhelh hmasak ṭuma fans min ṭawiawm tute chungah kan lawm a, zaninah pawh hian anni nena inkhel hmachhawn leh kan duh. BCA hi Zarkawt veng mai bakah player-te awmna veng hrang hrang aṭangin ṭawiawmtu kan nei a, anni hi kan chak na hnar an ni. Tuikual South kan hneh loh kha player siksawi fuh loh vangah a ngaih theih a, zanin erawh a danglam tawh ang," tiin Vanglaini palai a hrilh.

MSL2 ṭan hma khan BCA hian Marova Memorial Basketball Tournament final-ah Khatla TBL chu an lo hneh tawh a ni.

Mission Veng Vikings coach Reuben Lalchhandama chuan, "Kan match hmasa berah khan khan defending lam khan duhthu a sam lo a, tunah erawh kan pan na lai kha kan insiam ṭha tawh chuan ka hria. BCA hi team ṭha an ni tih hre mah ila player mal anga ven bik neih kan tum dawn lo," tiin Vanglaini palai hnenah a sawi.