Asia Cup final-ah India an lut

Bangladesh-a khelh mek Asia Cup-ah India chuan Thawhlehni zan khan Sri Lanka chu wicket ngain an hneh a, Asia Cup final an lut.

Shere Bangla National Sta-dium, Mirpur-a inkhelah hian bat hmasa zawk Sri Lanka hian over 20 chhungin run 138 an siam a, mi pakua an hloh. Sri Lan-kan batsman zingah ball 32-a hmachhawna run 30 vaw chhuaktu Chamara Kapugedera a che ṭha ber a, Indian bowler-te'n Sri Lankan batsman-te an ngam hle.

Indian bowler zingah Ravichandran Ashwin, Hardik Pandya leh Jasprit Bumrah-te'n wicket hnih ṭheuh an la a, Ashish Nehra chuan wicket khat a la bawk.

Asia Cup hmaa Twenty20 series-a an hneh tawh Sri Lanka lakah Indian batsman-te an zam lo a, over 19.2-ah mi panga chiah hlohin run 142 an vaw chhuak a, wicket ngain hnehna an chang.

Indian batsman zingah Virat Kohli a che ṭha fal a, kum 27-a upa Delhi tlangval hian ball 47 a hmachhawnah run 56 siamin a tawp thleng a dam.

Khelmual chhunga India fan-te lawm hlawh ber erawh Yuvraj Singh a ni a, hun rei tak chhung India tana khel tawh lo batsman hian ball 18 a hmachhawnah run 35 vaw chhuakin a thawhhlawk hle.

India chak zanah hian captain MS Dhoni chuan recrod thar a siam bawk a, six run vawi khat vaw chhuaktu hi international match-a captain nichunga six run vawi 200 vaw chhuak thei hmasa ber a ni.

Eng nge Asia Cup?

Asian Cricket Council hnuai-a tournament hi kum 1984 aṭang khan neih ṭan niin kum hnih dana khelh tura ruahman ni mah se mumal taka kalpui a ni hleithei lo a, vawi 13 khelh tawh niin Sri Lanka chu champion lai an ni.

Asia Cup hi a one day inter-national-a khelh ṭhin nimahse nikum khan kumin aṭangin ODI leh Twenty20 format-a inkhelh chhawk a nih tur thu puan a ni a, kuminah hian Twenty20 formant hi hman ṭan niin team panga an inel.

Tute nge tel?

Asia Cup-ah hian Test cricket khel pha chin India, Bangladesh, Sri Lanka leh Pakistan chu tling chiang sa an ni a, Asia khawmualpui ram zinga International Cric-ket Council associate member Afghanistan, Oman, Hong Kong leh United Arab Emirates-te'n qualifier an khel a, an inkhelh kual hnua a sang berin Asia Cup hi an khel a ni.

Kalphung

Asia Cup-a ram inel panga India, Bangladesh, Sri Lanka, Pakistan leh United Arab Emirates-te hi group khatah awmho vekin an inkhel kual vek a, a tawpah a sang pahnihin final an khel dawn.

India hian zanin dar 07:00-ah UAE hmachhawn dawn mah se an match hmasa pathumah Bangladesh, Pakistan leh Sri Lanka an hneh tawh avangin zaninah chak lo mah se final an lut chiang tawh.

Final lut tur dang erawh a la chiang lo. Zanin dar 07:00-ah Bangladesh leh Pakistan an inhmachhawn dawn a, a thlengtu Bangladesh hi an chak a nih chuan final an lut ang. An chak lo a nih erawh chuan Zirtawpnia Pakistan leh Sri Lanka inkhel an ngaihchan a ngai thung dawn a ni. Asia Cup final hi March 6-ah khelh a ni ang.