Milan-in Coppa Italia final an lut

AC Milan chuan Thawhlehni zan khan third division club Alessandria lakah 5-0 in hnehna an chang a, Coppa Italia final an inhlangkai. Inkhel hmasa nen belhkhawmin Milan hian 6-0 in hnehna an chang a ni.

San Siro-a inkhelah Milan tan forward Jeremy Menez leh defender Alessio Romagnoli-te chuan goal hnih ve ve an khung a, striker Mario Balotelli chuan goal khat a thawh ve bawk. Liverpool aṭanga loan-a Milan zawmtu Balotelli hian first leg-ah khan goal awmchhun chu penalty aṭangin a lo khung tawh bawk.

Milan hian kum 2003 hnuah Coppa Italia nomawi hi an la chawi leh miah lo a, kuminah hian beiseina an nei sang hle. Mahse, an hna hi a la awlsam dawn lo, nizana Juventus leh Inter Milan te inkhela chak zawk nen May thlaah final an khel dawn a ni. Champion lai Juve hian first leg-ah 3-0 a hma an hruai tawh avangin an tlang a rinawm.

Final an luh avangin Milan coach Sinisa Mihajlovic a lawm a, a lawmna ti zualtu chu hneh loh nei loa an kaltluang rei hi a ni. Kum 2016 bikah Milan hian vawi khat chiah hneh loh an la tawng a, tunah hian match 12 chhung chu hneh loh nei loin an kaltluang mek.

Kum 47-a upa Mihajlovic chuan, "Kum 13 chhung zet final kan khelh tawh loh avangin hetiang dinhmun kan thleng leh thei hi lawm tur a ni. Goal kan khung tam bakah kan chhuah lo bawk a, kan boruak tawn hi a nuam hle. Final-ah tunge kan tum dawn tihin min ti buai lo a, eng team pawh hmachhawn ila harsatna a awm lo ang," tiin beiseina a nei sang hle.