Barca tan record siamna hun ṭha

Zanin 1:30 hian Barcelona chuan La Liga match khel turin Rayo Vallecano khelmualah an leng lut dawn a, Luis Enrique naute hi an tlawm lo a nih chuan hneh loh nei loa kal tluang rei record thar an siam dawn a ni.

Champion lai Barca hian a zawnin inelna hrang hrangah match 34 chhung hneh loh an tawng tawh lo a, kum 1988-89 season-a Real Madrid-in tlawm nei loa kal tluang rei Spanish record an lo siam tawh chu an nih rual mek a, record thar siam turin match khat bak an mamawh tawh lo.

Catalan club khelh ṭhat kaltluang inṭanna hi nikum October thla kha niin zanina an hmachhawn tur Rayo hi 5-2 in an hneh. Hemi hnu hian Club World Cup-ah hlawhtlinna an chang a, Copa del Rey final lut tawhin Champions League last 16 paltlang turin an dinhmun a ṭha tawh hle bawk.

Team pahnihte season tir lama an inkhelh ṭum khan Neymar chuan goal li khungin Luis Suarez chuan goal khat a khung - Lionel Messi chu hliam vangin a inkhel thei lo.

Barca hian hrem vang-in defender Dani Alves an chhawr thei dawn lo a, hliam vanga buai mek Rafinha, Sergi Roberto leh Sergio Busquets te dinhmun a chiang lo bawk.