Atletico-in Barcelona an um ve zel

Spanish La Liga-ah Bar-celona chuan chak takin hma hruai rih mah se an hnungah Atletico Madrid an kal ve zel a, Diego Simeone-a naute hian Thawhlehni zan khan an mikhual Real Sociedad chu 3-0 a sawpin Barca nen an inthlauhna chu point nga chiah a ni leh rih.

Sociedad hian inrintawkna lian tak nen Atletico khelmual an pan a, an league match hnuhung vawi nga aṭangin point 13 an hlawhchhuak thei; February thlaah hneh loh an tawn loh bakah goal khat chiah an chhuah bawk.

Mahse, Vicente Calderon Stadium-ah mualneitu Atletico an ngam lo hle a, minute riatna lekah Sociedad defender Diego Reyes chuan an lamah ti lutin midfielder Saul Niguez chuan second half ṭan tirhah mawi takin a volley lut a; forward Antoine Griezmann chuan a club hlui lakah an goal thumna turin penalty aṭangin a khung bawk.

Atletico goal hnuhNung ber khungtu kum 24-a upa Griezmann hian Madrid derby-a Real Madrid an hnehna goal awmchhun a lo khung tawh bawk.

Tun season kal mekah Atle-tico hian league bikah goal 11 chiah an la chhuah a, match 27 an khelh tawh chinah anni aia goal chhuah tlem an awm lo. Goalkeeper Jan Oblak hian a zawnin match nga chhung clean sheet a nei tawh a ni.

Atletico hian league match 27 an khelh tawh aṭangin point 61 an hmu tawh a, hmahruaitu Barca chuan point 66 hmuin pathumna Real Madird chuan point 54 an hmu mek thung.

Simeone thukhawchang

Argentine manager Simeone chuan, "Kan khel ṭha a, a bik takin vawiin chuan kan midfield leh tlarhmate an khel ṭha zual. Inkhel hautak kan hmachhawn zawn a, heng hunah hian kan ṭhat tawk leh ṭhat tawk loh chu a lang ṭhin. Bul kan ṭan fuh kha kan chakna chhan a ni a, kan result hi a lungawi thlak hle," tiin a naute khelh danah a lawm thu a sawi.

Sawi chhunzawmin Simeone chuan, "Tun dinhmunah chuan Barca hian point an hloh thut hmel lem loh a, chuvangin keimahni inkhelah chiah rilru kan pek a ṭul," a ti.

Inkhel dangah Las Palmas chuan an mikhual Getafe lakah 4-0 a hnehna changhin relegation zone an hlat zel a, table-ah 15-na dinhmun an luah chho rih. Chak lo Getafe erawh 17-naah awmin an hnuai chiaha awm Sporting de Gijon nen point hnih chiahin an inthlau.