Lal dan indawt tihchhuah thar Hman rih loh tura tih a ni
General Administration department (GAD)-a Protocol & Hospitality Wing chuan, Mizorama lal dan indawt, Warrant of Precedence/Order of Precedence thar August 11, 2020 khan a tichhuak a; mahse, Chief Secretary chuan nimin khan hman rih loh turin a ti.
GAD Protocol & Hospitality Wing-in nimina notification a tihchhuah dan chuan, August 11, 2020-a tihchhuah Warrant of Precedence/Order of Precedence chu Chief Secretary chuan order dang a awm hma loh chuan hman rih loh turin a ti a ni.
Tarlan tawh angin, Warrant of Precedence siam danah Assam Rifles an lungawi lo a, chuvang chuan vawiina Independence Day lawmnaah tel an tum lo a, sàwmna an dawn pawh an pe kir leh a ni.
Hetih lai hian, August 13, Ningania autonomous district council (ADC) pathum - Lai, Mara leh Chakma ADC-a political party leh tlawmngai pawl hruaitute LADC CEM conference hall-a ṭhukhawm chuan, Warrant of Precedence chu siamṭha turin Chief Minister an ngen.
ADC pathumte chuan Chief Minister hnenah hian Warrant of Precedence tihchhuahah ADC hruaitute telh an ni lo tih sawiin, hriatthiam har an tih thu an hrilh a; ADC hruaitute an tel ve theih nan notification chu siamṭha turin an ngen a ni.
District council pathuma pawl hrang hrangte joint meeting chuan, Article of Warant no. 6-ah Chief Executive Member telh turin an ngen a; no. 7-ah ADC chairman, no. 8-ah deputy chairman, executive member leh an tlukpuite dah tur leh, no. 9-ah MDC-te dah turin an ngen bawk.
Nimina MADC CEM conference hall-a MDC, political party leh tlawmngaipawl aiawhte ṭhukhawm chuan Warrant of Precedence-a ADC hruaitute telh an nih loh avang hian a hranpa-a Independence Day hman an rel.