Leicester an zuih tan dawn em?

Premier League season tawp a hnai a, a ruh no thliar hran theih la ni lo mah se club phan chang tawh leh pa tuai deuh dah hranin an awm thuai dawn.

Thawhlehni zan khan Lei-cester City-in King Power Stadium-ah West Brom an draw a, point hnih an hloh avangin nizana inkhel result-in tun dinhmuna league hmahruaitu a hril ang. Tottenham Hotspurs-in West Ham an hneh chuan Foxes hi an lehpel thei dawn a, champion tur a chiang lo tawlh tawlh.

Foxes an chelh

Ṭan aṭanga minute 11-na lekah West Brom midfielder Darren Fletcher ball pek chu Salomon Rondon-a'n a pet goal nghal a, Leicester defender Robert Huth-a'n a hnathawh tur a thawk lo. Foxes goal chhuah dan a nem hret a, mah se goal an chhuah vangin an buai lo.

Darkar chanve hnuah Lei-cester midfielder Danny Drink-water ball pet chu Baggies defender-in an khawih pial hnuah goal-ah a kul lut a, kee-per Ben Foster tan dan rual a ni lo.

Baggies-in player pakua tawp goal veng turin dah mah se Leicester-in first half tawp hma hretin hma an hruai a, an goal khung dan en chuan champion khut thei an ni. Vei lam kil aṭanga Marc Albrighton vawrh luh chu nalh zetin Riyad Mahrez-a'n a kheng a, Andy King-a'n a hmawr a lo bawk nalh hle.

Second half ṭan aṭanga minute ngana lekah Craig Gardner-a'n dan rual lohin freekick a pet lut a, keeper Kasper Schmeichel dem theih a ni lo nachungin freekick chawitu Mahrez erawhin a puitlin tawk lohna a lantir.

Point khatah Leicester an lungawi lo a, Inrinnia Norwich an hneh ṭumin Foxes hian goal attempt vawi 13 an nei a, Baggies lakah vawi 22 zet nei mah se chakna goal an khung thei lo.

Leicester forward Jamie Vardy leh Shinji Okazaki te'n woodwork an tih per a, Jeffrey Schlupp leh Wes Morgan-te goal khung tur chu Baggies keeper Ben Foster-a'n a dan sak bakah Norwich laka chakna goal khungtu Leonardo Ulloa-a'n a zawnin Foxes chakna goal a khung thei lo bawk.

Eng nge an sawi?

West Brom manager Tony Pulis chuan, "Leicester-in team
ṭha an ni tih an lantir a, champion nomawi an chawi lai hmuh ka châk khawp mai. Keini tan erawh point khat hlu tak an ni a, point 40 hmu turin kan tuihal a
ṭul a ni," tiin an vannei tih a pha lo. Baggies hian point 40 hmu turin point li an la mamawh a, West Brom boss hian Premier League khel zel turin point 40 hi him turah a ngai niin a lang.

Leicester manager Claudio Ranieri chuan, "Norwich nena kan inkhelh ṭum aiin kan khel ṭha zawk a, goal kan chhuah hnuah pawh kan buai lo. Player zawng zawngin chak an duh tih an lantir a, an khel ṭha a, chance pawh kan insiam avangin kan khelh danah ka lawm a, kan result-ah erawh ka lawm lo," tiin an player-te khelh dan chu chhuanawm a tih thu a sawi.

Italian boss Ranieri hian inkhelh ṭan hmain Tottenham Hotspurs chu champion tura a rin thu a sawi a, hei hi an chunga pressure tam lutuk tur tih tlem a duh vang niin a lang. Amaherawhchu match 10 chiah khelh tur an neih tawh avangin Foxes hian pressure an nei chho ṭan niin a lang a, an dinhmun tak tak a lang chho ṭan ang.

Leicester hian season khar nan Chelsea an hmachhawn dawn a, hemi hma hian Everton leh Manchester United an la khelhpui dawn bawk avangin season tawp thlengin fiahna an tawng dawn niin a lang.