Chelsea an sang zel

Guss Hiddink-a hnuaiah Chelsea hma-sawnna a zuanin a zuang a, Jose Mourinho en-kawlna hnuaia relegation zone-a awm pha thuak thuak khan season tharah European competition khelh an er pha tawh ang.

Thawhlehni zan khan Carrow Road-ah Chelsea hian Kenedy leh Diego Costa goal hmangin Norwich 2-1 in an hneh a, point 39 hmuin nizan inkhel chhiar tel lohin pariatna dinhmun an luah mek.

Thlirna Tawi

Brazilian full back Kenedy-a'n second 39-na lekah yard 20-na
aṭangin a pet goal a, first tawp hma hretin Diego Costa-a'n goal hnihna a khung leh bawk. Second half-ah yard ruk vel lek
aṭangin Cameron Jerome-a'n crossbar a tih per a, minute 68-naa Nathan Redmond goal-in inkhel result a thlak pha lo.

Norwich hian match hnu-hnung pakuaah vawi riat zet an khingpui an hneh loh avangin tla thei dinhmunah an ding a, point 24 hmuin table-ah 18-naah an awm.

Blues vannei

Chelsea-in tun season chhung-a goal rang ber khung mah se awlsam takin khualmualah hnehna an chang lo. Thibaut Courtois-a'n a teammate-te back-pass man mah se referee-in Nor-wich freekick a pe lo a, Costa-a'n goal a khung hian chiang takin a offside bawk.

Norwich ṭantuten referee Lee Mason chunga an lungawi loh thu au chhuah pui mah se inkhel result a danglam phah lo. Chelsea an vannei tih a chian rualin team ṭha zia an lantirah a ngaih theih bawk.

Chelsea hian match 12 chhung chu hneh loh an tawng tawh lo a, Jose Mourinho hnuaiah khan match 16-ah point 15 chiah an hlawhchhuah avangin Dutch manager Hiddink-a hnuaia hma-sawnna hi hmuh hmaih theih a ni lo.

Blues hian April thla hnua a vawi khat nan a zawnin vawi thum hnehna an chang a, hei hian table-ah nghawng a nei lian hle. Chelsea-in league-ah match 10 khelh tur an la nei a, an hmachhawn tur zingah Liverpool, Manchester City, Tottenham Hotspurs leh Leicester City te an la awm avangin season thara European competition khelh phak hi a awlsam dawn lo a, chutihrualin kawng a awm tih a chiang.

Eng nge an sawi?

Norwich manager Alex Neil chuan, "An goal khatna an khung khan kan player paruk ngawt ball hnungah khan an awm a, chutichung a left back goal khung tur kan dang thei lo kha chu a lungawi thlak loh hle. Chelsea khan kan tlarhnung an ṭhiah vanga goal khung an ni lo a, chutiang chiah chuan an goal hnihna kha offside a ni a, assistant referee khan a hmu tur a ni," tiin an goal chhuah danah a lungawi lo.

Chelsea manager Guus Hiddink chuan, "Inkhel boruak tih san vak kha kan duh lo a, kan khingpuite khan an cho phur a ni. Goal nalh takin bul ṭan mah ila kan khelh zui zel dan erawh a chhuan tlak loh. Lehlam goal bul lama kan passing ṭhat tawk loh vangin a tawp thlengin inkhelh a harsat phah a ni," tiin a sawi.

Chelsea hian Nilaini zanah PSG nen Stamford Bridge-ah Champions League second leg an khel dawn a, first leg-a 1-2 a an chak tawh loh avangin Blues hmabak hi a awlsam lo khawp ang.

Inkhel dang

Kai thar Bourne-mouth-in Steve Cook leh Benik Afobe goal hmangin European competition khelh tum Southampton chu 2-0 in an hneh a. Sunderland-in hun tawp dawna Fabio Borini goal hmangin Crystal Palace laka an si phurh an sut a, relegation zone an chhuahsan.

Black Cats hian Dame N'Doye hmangin hma hruai zet mah se Palace-in Connor Wickham hmangin an lehthal a, mualneitu lamin Borini hmanga sut hramin 2-2 in an inhnehtawk.

Everton-in Ramiro Funes Mori, Aaron Lennon leh Romelu Lukaku te goal hmangin Aston Villa 3-1 in an hneh. Villa supporter-te lungawi loin stadium an chhuah san a, kum 1987 hnua a vawi khat nan an relegate ngei dawn niin a lang.