Aizawl FC-in Mumbai-ah point 1 hmu

Mumbai khawpuiah Aizawl FC-in ṭum hnih ngawt an si phurh an sut a, point khat an hawn. Nilaini zan inkhel hi 2-2 in a tawp a, hetihlai hian Shillong Lajong chu an mikhual Bengaluru FC-in 2-0 in an hneh.

Mumbai-a Cooperage khelmuala inkhelah hian Aizawl FC hi a tirah an che sual nghal a, minute thumna lekah handball vangin penalty an chawi - hei hi Ryuki Kozawa chuan a thun a, minute 3-naah 1-0 a ni. Aizawl FC an khel ṭha takzet a, minute 18-naah goal ropui an khung - Kawnpui tlangval Albert Zohmingmawia chuan defender pathum a bum hnuah goal thunin 1-1 a ni a, chawlh lâwkah pawh 1-1 a ni.

Second half an ṭan a, ISL player ṭhahnem tak hawhtu Mumbai FC bawkin goal an thun leh a, Eric Brown chuan minute 57-naah an goal hnihna a khung. Aizawl FC an vanduai reng bik lo a, minute 63-naah an sût - goal thuntu erawh Mumbai FC player thar Syed Rahim Nabi a ni a, a ni hian a team thar lamah a tilut palh.

2-2 in an ṭin a, David Lalrinmuana chu Hero of the Match-ah thlan a ni a, player langsar bera chhal ngam erawh Albert a ni. He result hi Aizawl FC tan result duhthusam ni phak lo mah se Nilai zan hi zan duhawm a tling - an elpui Mumbai FC lamin point khat bak an hmuh belh lo a, chutih-laiin Shillong Lajong an lo chak lo bawk.

Shillong-a JN Stadium-a nizana inkhelah Udanta Singh (36') leh Kim Song Yong (82') ten mikhual tan goal an thun a, Bengaluru hi champion tumin Mohun Bagan nen an inum chho zel.