Australia-ah Masi leh Kumthar

Cricket khawvela Series inkhelh awm reng renga ngaihhlut ber leh mikhual tena hnehna chan har an tih ber ṭhinna hmun Australia ngei mai chu Virat Kohli leh a nauten kumin kumtawp hian an han tlawh leh dawn.

Kum 1947 aṭang khan Men in Blue hian kum 3-4 danah Australia hi an lo tlawh tawh ṭhin, ṭum 11 zet an tlawm hnuah 2108/19-a an tlawh ṭum khan history siamin, Virat Kohli leh a hoten Test match vawi li khelhah series 2-1 in an la. India cricket team-ten Australia leilungah chak zawk dinhmun an hauh vawi khatna a ni.

Mahse Cricket lam nganatuten hemi ṭuma India hnehna chan hi Australian star rual, a ṭha ho, ball tampering vanga hrem tawk leh inhliam vanga inlan thei lo an tam avangin an dah sang hran lo. Tun ṭum erawh team pahnihte member kim taka an inlan theih dawn avangin ngaihven a hlawh zual bik.

Australia rama cricket pitch-ah hian ball a sawt sangin, a chak bik hle. Hei vang hian ram dang India te ang, pitch muang leh ball sawh hniamna hmuna khel ṭhang te hian hma khaw sang aṭangin khelh har an ti em em ṭhin. Kum 70 dawn record en hian a chiang.

Australia-a inkhel entute hi khawvela mikhualte tana chimawm leh chhaih zam thiam tak an lo ni bawk nen. Players tamtak in tun hma aṭang tawhin, an thin in a tuar loh avanga mualpho zeuh zeuh an lo awm tawh ṭhin. Tuna India captain Kohli ngei pawh hi a rawlthar deuh lai kum 2012 khan a lo mualpho tawh kha.

India captain Virat Kohli hi Test match hmasa ber Adelaide-a an khelh zawhah fa hmasa ber a pian dawn avangin 'maternity leavel a la dawn. Batsman rinrawl leh Australia-a tun hma lo khel ṭha tawh ṭhin a nih avangin India tan a pawi thei. 

Kohli-a'n Test match vawi khat chauh a khelh dawn avangin Cheteshwar Pujara leh fitness ṭha tawk lo chunga koh luh Rohit Sharma te kutah nasa takin team a innghat ang. Captain aiawh tur Ajinkya Rahane-ten a game ṭha ber an pholan a ngai ang.

Hetah hian rawlthar batsman hoin chance an lak thiam a ṭul. Australia mipui, mikhual te chunga ṭha lo ve tak kan tih, mahse sporting spirit nei ṭha em em te hian, an hmelma te che ṭha an awm erawh chuan Standing Ovation hial pe leh lawi si an ni. 

Mi huaisen kal hmasa Sunil Gavaskar, Sachin Tendulkar, Rahul Dravid te khan mipui hnen aṭangin chawimawina an lo dawng tawh. Hetiang dinhmun luah ve thei tur hian Subhnam Gill, KL Rahul, Mayank Agarwal te hoin hun ṭha an nei.

Bowling Department lamah tun hmaa Australia tour apianga che ṭha ṭhin inhliam avangin Ishant Sharma hmel kan hmu thei lo tur hi a uiawm hle. Jasprit Bumrah leh Mohammed Shami te an pawimawh khawp ang. 

Australia pitch-ah khuan ball a sawh san leh kawh bik avangin bowler tam tak hian an phur luatah ball an vawm 'short' nasa ta ṭhin lutuk a, Australia batsman ho horizontal bat vuak lo ṭhanhnan tawh te khuan an lo mualpho fo reng a ni.

Tun hma a che ṭha ngai lo, Ravichandran Ashwin leh Ravindra Jadeja ten supporting role an khelh thiam a ngai dawn. India ram pitch anga ball a spin leh turn ṭhat loh avang hian thutlukna siamtuten spinner zingah thlan ber tur an harsat ang.

Test match hmasa bera David Warner inhliam vanga awm lo ringawt pawh hi India tana thawk huaina tham a ni tawh. Tunlai khawvel bowler-ten vawm hlum dan an hriat meuh loh, khawl emaw tih mai tur Steve Smith leh rawlthar Marnus Labuschagne te ringawt pawh hi India team mut ti tui lo tur chu an ni sa hrim hrim bawk.

Chu ai zawng chuan Test match-ah chuan chak turin wicket 20 lak a ngaih avangin Mitchell Starc, Pat Cummings, Josh Hazlewood leh Nathan Lyon te quartet bowling combination hi Australia pitch angah chuan, intum hma aṭangin mangchhia a ni pha. Batsman tam tak career lo tihtawpsak tawh ṭhin khawpa rapthlak an ni.

Thla khat Test match li chhunga an khelhna turah hian Australia rau rauah leh khawvela pawh ball sawh sanna leh a kawh duhna ber Perth leh Hobart-ah an inkhel lo tur hi India tan thu lawmawm a ni ngei ang. Test hmatch hnuhnung ber The Gabba, Brisbane-ah erawh 'cheraw' an kan zak zak mai ang tih a hlauhawm fu.

Australia Pitch hoah chuan ball sawh san lohna leh batting nana nuam leh a ni hnuhnung pahnih vela spinner ten vawm nuam an tih ve deuhna, Adelaide leh Sydney an chang tur hi, India tan thu lawmawm a ni. 

Chutihrualin Adelaide hi Day/Night ball sen no hmanga inkhelh tur a nih avangin, thim hlim lamah hian ball a che nasa ṭhin a, ball chet tamna (swing) a record nei ṭha lo India batsman-te'n kekawr an sawi chhin ve fe chu ngai ngei ang.

Boxing Day Test ( Masi ruai ṭheh ni) a, Melbourne MCC, khawvela Cricket Stadium lian leh zau ber a, tunhma mi nuai chuang entu kara lo mualpho tawh ṭhin India team hian, Kohli a tel loin hnehna sual chhuak thei tak maw?

Helam khawvel hmar lama thlasik kan hman lai hian, Southern Hemisphere ho tan chuan an nipui khaw lum zual lai ni ve thung a. Kumin Masi leh kumthar vuakvet chu, kan hripui boruak vel avangin, eng boruak teh vak kan nei dawn lo tih a chiang.

Cricket ngainatute tan chuan, Australia nipui lamah kan TV herh ila, he Test Series boruak hot tak hmang hian i intihlim mai ang u aw.