City an duap, United an vannei

Manchester City-in Pathian-ni zanah League Cup nomawi chawi turin Liverpool an hneh a, ni thum hnuah Reds-in Premier League-ah phuba lain City hi 3-0 in an sawp. Nilaini zan vek hian Manchester United chuan Juan Mata freekick hmangin Watford 1-0 in an hneh hram a, vanneihnain Louis Van Gaal leh a hote a hnuchhawn bik lo.

Manuel Pellegrini hoten kum 2015 zawhah point 36 an hmu a, hetih hunlaia hmahruaitu Arsenal point thum chauhin an pha lo. January thla ṭan-tirhah City-in season thara Pep Guardiola an lakluh tur thu an puang a, thla hnih a ral meuh chuan point 47 hmuin hmahruaitu Leicester City point 10-in an pha tawh lo. City hian season hmang ṭha lo Chelsea 5-1 zeta hneh loin FA Cup aṭangin an tla tawh a, Chilean coach hmalam hun chian hnua Citizens result hian ngaihtuah a ti thui hle.

Ni thum hnuah Reds

German coach Jurgen Klopp hian duh thlang thei se League Cup nomawi chawi a duh zawk ngei ang, chutihrualin ni thum hnua thawh hi Reds tan duhthusam a ni. Anfield-ah 3-0 zetin City an sawp a, Liverpool ṭantute mittui cham bang hruk hulin a awm.

Liverpool tan Adam Lal-lana, James Milner leh Roberto Firmino ten goal an khung. Reds lawmna belhchahtu chu sum leh nomawi duh vanga club phatsantu Raheem Sterling-a'n Anfield-a kir hmasak berah beisei a pha lo a, halftime-ah lakchhuah a ni.

Liverpool manager Jurgen Klopp chuan, "Ka player-ten pressure an pek ṭhat ber ṭum a ni a, City khan inkhelhna hun an nei lo a ni ber. Liverpool hmangaihtute tan zan duhawm a ni a, kan point hloh tawh zo zaite kha kan lak kir leh a hun tawh a ni," a ti. German coach hian chak an phu tih a sawi a, goal thum an khung leh goal an chhuah lo hian dawt a sawi loh tih a tilang chiang hle.

Nomawi kalsan

City-in nomawi lak tumin theihtawp an chhuah pawhin an lang tawh lo a, nomawi an kalsan ang hialah a ngaih theih. Citizens hian kuminah league match vawi 8 khel tawhin point 13 zet an hloh tawh a, khualmuala an record lah a chhe hle - away match hnuhnung 10-ah vawi hnih chiah an chak.

Striker ṭha Sergio Aguerio leh David Silva-te dah ṭhat chuan player dangin champion châkna an nei lo ang hialah a ngaih theih. Spanish winger Jesus Navas a bo tluan a, midfielder Fernando leh Fernandinho-te pawh Reds player thawkrimten an chep ral bawk.

Manchester City manager Manuel Pellegrini chuan, "Cham--pions League leh League Cup final kan khelh avangin kan player-te'n ngai an la awh lo a, Liverpool an khel ṭha zawk a ni," a ti.

Chilean manager chhuanlam hi City neitu lam tan pawm a harsa a, an khingpui Reds hian League Cup final an khelh ve tho bakah Europa League last 32-ah Augsburg nen match hautak tak an khel bawk. Tun hnai result aṭanga thlir chuan Pep Guardiola-a'n season thar-ah Champions League club a enkawl lo thei a, Pellegrini pawhin season tluanin City hi a kaihruai lo thei bawk.

Chhandamtu Mata

Watford hmachhawn turin Louis van Gaal-a'n Arsenal an hneh ṭum aiin player thlan tur a ngah hret a, starting eleven-ah Anthony Martial leh Marcos Rojo-te a chhawr theih bakah bench-ah Matteo Darmian-te a dah thei bawk.

Arsenal hneh vanga team boruak ṭha Manchester United aiin Watford an ṭang thei zawk a, defence laiah Tim Fosu-Men-sah leh Daley Blind te inkawpin Michael Carrick tel lo a hriat hle. Watford forward Odion Ighalo leh Troy Deeney te finishing tawih tawk lo leh keeper David de Gea-te chu United lama goal luh loh chhan a ni.

First half-ah Marcus Rash-ford a reh a, second half-a Mar-tial nen an awmna an inthlak hnuah English forward hian dinglam kil aṭangin inkhelh a thiam tih a nemnghet nawn a, chutihrualin United-in inkhel an thunun chhung hi hun rei lote chhung chauh a ni.

Tun hnaia harhtharna chang Memphis Depay-a'n ball pet kawngah United tana jersey 7 ha tawh ṭhin David Beckham a elpha lo hle tih a lantir nawn. Martial-a'n a pal chak zarah minute 83-naah freekick a hlawh chhuak a, captain Juan Mata-a'n a ke vei lamin goal kilah a khung. Mahni muala khel United an ṭangtluan hram a, point hmuh an phu loh zanah point thum an hlawh chhuak.

Manchester United boss Louis van Gaal chuan, "Tharum hmanna inkhelah hnehna kan chang thei a, kan elpui team dangte an chak loh bawk avangin kan result-ah hian kan lawm hle. Sunderland kan hneh loh ṭumin min sawisel luai luai a, mah se tuna result hian Premier League a sawifiah chiang hle. Palina kan hnaih chho leh ta a, theihtawp kan chhuah zel ang," a ti.

United hi Europa League last 32 first leg-ah FC Midtjylland lakah an mualpho a, hemi hnu hian match li khel leh tawhin an la chak vek. Van Gaal-a hote hian an hmelma City nen point 47 ve ve an hmu a, Pellegrini hote hi vawi khatin an khel tlem zawk.