Champion lai TBL hmah Serpents

Mizoram Super League cham^-pion lai Khatla TBL leh Zarkawt Serpents-te chu zanin dar 8:00 hian Hawla Indoor Stadium, Republic Vengthlangah an inhmachhawn dawn a, fans nei ngah ṭhin pahnih an nih avangin inkhel entu an tam ang.

MSL1-ah Khatla hian vawi khat chiah chak loh an nei a, zanina an khingpui tur Serpents hi an hneh loh chu an ni. TBL hi team ṭha zawka ngaih ni mah se an sulhnu enin chak zawk tur sawi huai a harsa.

Zarkawt Serpents hian an match hmasa berah Mission Veng Vikings hneh lo mah se insiam-
ṭha nghalin Chaltlang Ryders lakah 79-74 in hnehna an chang leh tawh a, Ryders an hneh ṭuma point 20 score thei Lalramropuia leh point 28 score thei Sahil Sharma-te an dam ṭhat avangin TBL hi an hlau bik lo ang.

Serpents hian an match hmasa pahnih hi coach Arvinder Singh Bawa tel loin an khel a, zaninah erawh national level pawha tawnhriat lo nei tawh kaihhruaina hnuaiah an match hmasa ber an khel dawn a, inrintawkna neih belh tura ngaih an ni.

TBL hian an match hmasa berah MVP H.Laldinsanga (Mapuia) hoin Chaltlang Ryders an hneh a, hemi ṭuma player langsar ber erawh point 21 score thei center David Lalrinchhana a ni. Anni pa-hnih bakah hian shooting guard Vanlalmuana hi ven uluk ngai bik tur zinga mi a ni.

Zarkawt Serpents asst. coach Dino Laldinpuia Chhangte chuan, "MSL chinah chuan player ṭha bik a sawi theih tawh loh a, mimal tin ven uluk vek kan ngai. Kan guard lam kan ti chhah tawh dawn a, TBL lakah hian result ṭha kan neih theih ngei ka beisei," tiin Vanglaini palai a hrilh.