Gunners vanduai hun a inṭan chho?

Emirates Stadium-ah Arsenal ṭantuten an player-te chhuak tur an au el a, Arsene Wenger-a'n an vanduai thu a sawi. Premier League hmahruaitu Leicester City point hloh tukah champion elpha tur Arsenal leh Tottenham Hotspurs-te an chak lo a, season hriatthiam har takah Gunners-in an ze ngai an chhuah ṭanah a ngaih theih bawk.

Nilaini zan inkhelah Arsenal-in Joel Campbell hmangin minute 15-na lekah hma hruai mah se Swansea-in Wayne Routledge leh Ashley Williams-te goal hmanga lehthalin 2-1 in hnehna an chang a. Upton Park-ah West Ham winger Michail Antonio-a'n goal awmchhun a khung a, Spurs-in hmahruaina hun ṭha an bawhpelh.

Vanduai nge tlaw?

Arsenal-in Champions League-a Barcelona an hneh loh hnuah Manchester United laka an tlawm zui avangin chak an mamawh a, Swansea lakah tha tho takin an bul ṭan.

Costa Rican forward Camp-bell-a'n player ṭha bik goal khung dan turin a pet goal a, Arsenal khel a mawi hle. Gunners-in an bul ṭan ṭhat engmah loah chhuah zuiin Swans-in Wayne Routledge hmangin minute 32-naah an siphurh an sut. Goal luh chhanah Mesut Ozil a dem theih a, Gunners tlarhnung ṭhiah an awl hret bawk.

Mikhual team-in Ashley Williams hmangin minute 74-naah chakna goal an khung zui a, Gunners zinga rintlak bera ngaih Petr Cech-a tihsual liau liau a ni. Tlak hlau Swans-in point 30 an hmu chiah a, relegation zone
aṭanga an himna hi point ruk a ni.

Gunners tan Olivier Giroud leh Alexis Sanchez te'n crossbar an tih per ve ve avangin Arsene Wenger-a'n an vanduai tih a sawi hi thudik a ni a, season tawp lama an vannei thei miah lo erawh an tlaw vangah a ngaih theih tho bawk.

Arsenal-in khualmualah Tottenham, Everton, West Ham, Sunderland leh Manchester City-te an hmachhawn dawn a, Arsene Wenger-a hoten a pawimawh ber 'tun hun' aiin 'season thar' an ngai hlu zawk ang tih a hlauawm leh ta hle.

Kum 66-a upa Arsene Wenger chuan, "Kan result hi a ngaihmawhawm ta hle mai. Mumang rama cheng loin a tak ramah kan let a ṭul a, kan result lungawithlak loh tak aṭang hian kan thawh chhuah a ṭul a ni," tiin champion thlir loin an match khelh leh tur chiah ngaihtuah a
ṭul thu a sawi.

Spurs vawtu Hammers

Tottenham-in January 14-a Leicester an hneh loh hnuah a zawnin vawi ruk an chak a, Foxes an tawlh thluk avangin league hmahruaitu ni thei turin West Ham hneh a tawk.

Upton Park-ah Spurs-in ṭum danga an khelh angin an khel chhuak lo a, minute sarihna leka Hammers tana Antonio tauh luh chu an sut thei lo.

Spurs hi March 1964 hnuah league hmahruaitu an la ni leh lo. Nilaini zan hian Toby Alderweireld leh Harry Kane te goal khung tur chu West Ham keeper Adrian-a'n dan sakin chance ṭha nei tho mah se chak phu zawk chu Hammers an ni.

West Ham tan pound makta-duai 10 man midfielder Dimitri Payet a vul chho zel a, supporter thawm a ṭha bawk. Hammers hian tun season chauh tuna sta-dium hman lai Boleyn Ground (Upton Park) hi an hmang tawh dawn.

Tottenham Hotspur manager Mauricio Pochettino chuan, "First half aiin second half-ah che ṭha mah ila goal khung miau loh chuan point hmuh a harsa a ni. Kan khel ṭha lo a, pawi kan ti a, chutihrualin second half-a kan rilru put hmang erawh a chhuanawm viauin ka hria," tiin a sawi.

North London Derby

Champion pakhat chauh an awm dawn a, champion thei erawh an tam. Chak lo mah se Tottenham leh Arsenal te hi nomawi chawi tura rinkai an ni chhunzawm zel a, Inrinni zan 6:15-ah club pahnih hi White Hart Lane-ah an inhmachhawn ang.

Arsenal-in an chet chhiat vanglai takin North London Derby an khelh a ṭul dawn. An harsatna belhchhah turin keeper Petr Cech chu Swans an hneh loh ṭumin hun tawp lamah a ṭhal (groin) ah hliam a tuar a, chawn hliam vangin defender Laurent Koscielny a inlan lo. Player pawimawh pahnih hian Derby match a khel thei dawn lo.