Pakistan hnehtu Bangladesh-in final lut

Asia Cup khelh mekah a thlengtu Bangladesh chuan Nilaini zan khan wicket ngain Pakistan an hneh a, final-a India hmachhawn turin an in vaw kai.

Shere Bangla National Stadium, Dhaka-a inkhelah hian Pakistan hi chak se chuan final lut thei dinhmunah an ding a, mahse khawvel hmuh chak final an thlen tir thei ta lo.

Bat hmasa zawk Pakistan hian over 20-ah run 129 an vaw chhuak a, mi pasarih an hloh. Pakistan batsman zingah Sarfraz Ahmed a che ṭha ber a, kum 28-a upa batsman hian ball 42 a hmachhawnah run 58 a vaw chhuak.

Sarfaz Ahmed hi a tawp thlengin Pakistan tan ding mah se batsman dang te'n Bangladesh bowler-te a ngam meuh lo. Bangladeshi bowler zingah Al-Amin Hossain a che ṭha a, over li a vawmah run 25 chiah pein wicket thum a la a ni.

Bangladesh batsman-te'n over 19.1-ah an target an umpha a, run 131 vaw chhuakin mi panga chiah an hloh. Bangladesh batsman zingah ball 48 a hmachhawna run 48 vaw chhuaktu Soumya Sarkar a che ṭha a, Mahmudullah chuan ball 15 a hmachhawnah run 22 vaw chhuakin a tawp thleng a dam.

Asia Cup final hi March 6-ah khelh a ni dawn a, Bangladesh hian an hneh loh tawh India an hmachhawn dawn a ni.