Team huaisen Inter hnehtu Juve-in final lut

Juventus chuan goal thuma hma an hruai zet hnuah goal thum an chhuah leh a, penalty shootout-ah Inter Milan hnehin Coppa Italia final an lut.

January thla khan Turin-ah first leg an lo khel tawh a, mualneitu Juve hian 3-0 in hnehna an chang. Nilaini zan pawh hian awlsam taka final lut mai tura ngaih an ni a, star player pahnih Paul Pogba leh Gianluigi Buffon-te chu bench-ah ṭhut hahchawlhtir an ni.

Mahse, San Siro-ah In-ter Milan-in huaisen takin an mikhual an lo bei let a, Marcelo Brozovic-a goal hnih leh Ivan Perisic goal khat khung hmangin an si phurh an sut zo! Extra time khelh a ngai a, goal a lut lo thung.

Penalty hmangin final lut tur zawk chin fel a ni a, Juve tan Andrea Barzagli, Simone Zaza, Alvaro Morata, Pogba leh Leonardo Bonucci ten penalty petin an chhuih lut vek a, Inter tan Marcelo Brozovic, Rodrigo Palacio, Rey Manaj, Yuto Nagatomo ten pet goal mah se Rodrigo Palacio-a'n a khung ve lo.

Juve hian nikum final khan Lazio chu penalty aṭang bawka hnehin champion nomawi an lo chawi tawh. Semifinal hmasa zawkah AC Milan chuan Alessandria 6-0 in an lo sawp tawh bawk. Final hi May thlaah khelh tur a ni ang.

Juventus boss Massi-miliano Allegri chuan, "Keimahni lam tihsual vangin goal kan chhuah a, second leg khelh ṭan hma khan kan dinhmun ṭha zawkin lang mah se San Siro-a inkhel tur kan la nih avang khan a harsat tur kha ka hre lawk. Eng inelnaah pawh final luh hi chu a awlsam ngai lo," a ti.

Inter boss Roberto Mancini chuan, "Serie A-ah match 18 khelh a nih thleng kha chuan hmahruaitu kan ni a, tuna kan dinhmun thlirin mi tam takin min sawisel. Coppa Italia-ah semifinal-ah kan chak lo leh a, sawi-selna kan dawng hnem leh dawn. Mahse, keni chu kan kal ngaiin kan kal zel ang," tiin a sawi.