Khualmualah Real Madrid an chak
Nilaini zan khan La Liga inkhelah Real Madrid chuan hnehna an chang a, league table mawngphah luahlumtu Levante chu 3-1 in an hneh.
Inkhel ṭan aṭanga minute 34-na lekah Real-in goal an khung a, penalty aṭangin Cristiano Ronaldo chuan an hmahruaina goal hi a khung.
Minute li hnuah Real-in goal an khung lehnghal a, Borja Mayoral goal shot-in post a per hnuah Levante keeper Diego Marino-a per leh a, a goal chiang hle.
Relegation zone aṭanga tal chhuah tum Levante an harh zawk a, an goal hnihna an chhuah aṭanga second rei lote hnuah Levante forward Deyverson-a'n goal khat a khung.
Team pahnihin goal dang an khung lawk loh hnuah Real-in injury time-ah an chak nemngheh nan goal an khung a, goal khungtu hi Isco niin Real-in 3-1 in hnehna an chang.
Zidane thukhawchang
Real Madrid manager Zinedine Zidane-a'n player inhliam a ngah avang-in khelmual chhunga an hmel lan tam lo Lucas Vasquez, Casemiro leh Borja Mayoral-te inkhel bul a ṭan tir a, French manager chuan ti fuh a inti hle.
Zidane chuan, "Player tam tak ka thlak kual avangin a awlsam dawn lo tih ka hria. Mahse, ṭha takin ka nauten an khel chhuak a, game hmuhnawm tak min entir a ni. Inkhel ṭan tir lamah awlsam lo mah se game kan thunun chhunzawm a, point thum hlu tak hmuin kan khel ṭha hle a ni," tiin a lawm hle.
Valencia chak
Gary Neville-a enkawl Valencia-in chak hmel an hmu ve leh ta a, an match hnuhnung paruka an vawi nga chakna turin Malaga chu 2-1 in an hneh.
Malaga tan Duje Cop chuan goal hmahruai khung mah se Malaga keeper Carlos Kameni-a'n an lamah goal khat a ti lut a, Real aṭanga loan-a Valencia zawmtu Denis Cheryshev chuan an chakna goal a khung bawk.
Aritz Aduriz bawk
Athletic Bilbao tan veteran striker Aritz Aduriz-a'n goal khung a bang thei lo. Kum 35-a upa striker hian Deportivo La Coruna 4-1 a an sawpna inkhelah goal thum a khung a, tun season league match-ah goal 17 a khung ta.
Spain tana vawi khat lo inlan ve tawh striker hian tun season-ah inelna hrang hrangah match 41 a khel tawh a, goal 30 a khung tawh a ni.