Sum hman hnem tum Liverpool

Kum 2014-a pound maktaduai 75-a Luis Suarez hralhtu Liverpool-in khelmual pawn lamah an striker hralhna an hlawkpui zel a, tun hnaia an sum hman dan an tarlannaah Suarez an hralh avangin pound maktaduai 60 vel hlawkna an tel.

Liverpool hi May,31 2014 - May 31, 2015 inkar khan an sum lakluh chu pound maktaduai 297.9 niin 16.5 % in a pung a, media revenue lamah pound maktaduai 122.6 la lutin a punna zat hi 21.5% a ni.

Reds chief executive Ian Ayre chuan sum an hmanna tur sawiin, "Manager ṭawiawm ṭhat loh hi kan nei ngai lo. May thla lo thleng se la, Jurgen pawh hian kan ṭawiawmna ṭha takin a dawng ang. Kan vanneihna em em chu kan sum hmuh apiang team tan kan hmang zel hi a ni," tiin nipui transfer-ah Jurgen Klopp chu sum tam tak pek an tum thu a sawi.

Hetihlai hian Reds manager Jurgen Klopp chuan season thar atana an inbuatsaih der tawh thu sawiin, "Season thar atan kan inpuahchah der tawh a, game atan chauha inpuahchah kan ni lo. Transfer bazara che hmasa ber nih lam kan ngaihtuah lo a, kan hmalam hun atana kan lo inruahman lawk erawh a ngai a ni," tiin nipui transfer-a lo thlir lawk ve bawk.