Nomawi pathum la beiseitu PSG

Paris St-Germain chuan tun season-ah nomawi pathum chawi an beiseina an la chhawm nung zel. St Etienne chu 3-1 a hnehin French Cup semifinal an inhlangkai.

Nilaini zan inkhelah PSG hian Edinson Cavani, Marquinhos leh Lucas Moura-te hmangin goal an khung a, St Etienne goal neih chhun hi minute 43-naa Valentin Eysseric-a'n penalty aṭanga a khung a ni.

PSG striker Zlatan Ibrahimovic-a'n goal khung lo mah se a team tan a thawhhlawk a, an goal hmasa pahnih khi Sweden captain siam sak ve ve hi a ni.

Kartawp khan PSG hian league-ah Lyon chu 2-1 in an hneh lo a, an chak loh hnua an match hmasa berah an insiamṭha lehnghal. Laurent Blanc-a naute hian French Ligue 1-ah point 23-a hmahruai fal mekin champion chiang tawh a ngaih an ni a, Champions League-ah beisei an la nei bawk.

PSG manager Blanc chuan, "Saint-Etienne hi inkhelh harsatna hmun a ni a, he hmuna chakna kan chang thei hi a hlu. Lyon laka chak lo hlim kan ni a, kan chak lohna kha hnual phah nana hmang loa chak duhna thinlung kan nei zui hi a lawmawm hle," tiin a sawi.

Inkhel dangah Lorient chuan Ajaccio lakah 3-0 in hnehna an chang a, Sochaux pawhin 3-2 in Nantes an hneh ve bawk.

Tihian PSG, Lorient leh So-chaux ten semifinal an inhlangkai ta a, nizan inkhela Granville leh Marseille-te aṭanga a chak zawk zawk chuan hmunruak pakhat la awm an hnawhkhat ve ang.