Mainz lakah Bayern Munich an chak lo
Nilaini zan German Bundesliga inkhelah hmahruaitu Bayern Munich chu Mainz lakah 2-1 in an chak lo a, inkhel dangah Borussia Dortmund-in an khingpui an hneh thung avangin league title inchuh boruak a nung thar hle.
Allianz Arena-a inkhelah kum 2005 December thla hnua a vawi khat nan league-ah Bayern hian German player pakhat Manuel Neuer chiah hmangin inkhel bul an ṭan a, forward Thomas Muller leh Mario Gotze te bench-ah ṭhut tir niin captain Phillip Lahm chu squad-ah telh a ni lo.
Franck Ribery chuan khum khat chuang zet hnuah a vawi khat nan Bundesliga inkhelah bul a ṭan ve leh ta a, Dutch captain Arjen Robben-a'n league-ah minute 616 chhung zet goal a khung loh hnuah khung ve leh tawh mah se anni pahnih hian Bayern an chak pui zo lo.
Inkhel ṭan aṭanga minute 26-naah Jairo Samperio chuan goal hmahruai a khung a, second half-ah Bayern tan Robben chuan yard 25-a hla aṭangin mawi takin an siphurh sut mah se substitute Jhon Cordoba chuan Mainz tan chakna goal a khung ve leh a ni.
Bayern hian an khelmual hi an hmangthiam hle a, inelna hrang hrangah a zawnin match 17 chhung hnehna an chang tawh. Mahse, Mainz hian an record duhawm tak chu an tih tawp sak rih a, anni hi tun season-ah Allianz Arena-a goal khat aia tam khung thei hmasa ber an ni nghe nghe.
Guardiola thukhawchang
Season thara Manchester City manager ni mai tawh tur Pep Guardiola chuan, "Zaninah khan Bundesliga hi league hautak tak a nih zia kan hmu chiang a, eng team mah a zawna vawi li champion thei an la awm loh avangin hnuhma thar siam hi a awlai dawn lo hle. Kan khel ṭha tawk lo tih chu a chiang a, mahse lungngaia indawm kumna hun a la ni lo," tiin a sawi.
Bayern hian point 62 hmu mekin hmahruaitu la ni mah se an hnuai chiaha awm Dortmund hian point 57 an hmu tawh a, team pahnihte hi kar tawp hian Signal Iduna Park-ah an intawng dawn a, he inkhel result hian season tawpa nomawi chawi tur a hril thui thei tawh hle ang.
Dortmund an chak
Borussia Dortmund chuan khualmualah Darmstadt chu 2-0 in an hneh a, Bayern nen an inthlauhna chu point nga chiah a ni ta.
Thomas Tuchel-a naute hian Adrian Ramos leh Erik Durm te goal khung hmangin hnehna an chang a, league match an khelh hnuhnung vawi sarih aṭangin vawi ruk ngawt hnehna changin champion nomawi an la beisei chhunzawm zel a ni.