Cazorla chawl rei dawn

Arsenal midfielder Santi Cazorla chu a khup hliam vanga a chawlh reng hnuah lo kir leh hnai tawh mah se harsatna dang a neih avangin tun season chhung chu a hmel kan hmu tawh lo maithei.

Season tir lama Arsenal leh Norwich City te 1-1 a an inhnehtawk ṭum khan Spanish midfielder hi a inhliam a, a khup an zai na hi chu a dam hnai tawh a, March 16 a Barcelona nen Champions League last 16 second leg an khelh hunah chuan lo kir hman tawh tura beisei a ni. Mahse, November thla a?anga la inkhel leh lo Cazorla hian a keah na a neih leh avangin a chawlh rei a ngai dawn.

Gunners manager Arsene Wenger chuan, "Santi dinhmun a ṭha lo a, a khup chu dam chho mek mah se a keah na a neih leh avangin a chawlh hun chhung tur a rei phah dawn a ni," tiin a sawi.

Arsenal hian an midfielder Jack Wilshere chu tun season-ah hliam vangin an la chhawr miah lo a, English player dang Alex Oxlade-Chamberlain chu khup na vangin kar ruk a?anga kar riat chhung vel an chhawr thei dawn lo bawk a ni.