Liverpool vs Tottenham: Tu nge ropui zawk dawn?

Zanin dar 1:30-ah Premier League match inkhel hmuhnawm bik en tur a awm dawn a, hmahruaitu nih inchuhna inkhelah Liverpool chuan Tottenham Hotspur an mikhual dawn. 

Spurs hian table-ah point 25 hmuin hma an hruai mek a, an hnuai chiaha awm Liverpool nen an point hmuh zat a inang - London club hmahruaina hi goal difference chauh a ni. 

Khawthlang media-te chuan zanin inkhel tur hi tun season Premier League-a inkhel boruak sang ber ni turah an ngai a, team pahnih tan fiahna hautak a ni ve ve dawn tih a sawi ngam. 

Kartawp league inkhelah khan thil mak danglam tak a thleng a, club pahnihin an khingpuite 1-1 in an inhnehtawkpui ve ve - zaninah result duhawm hlawhchhuah tumin thih tha nen an bei ang. 

Premier League-a champion rin hlawh ber chu Liverpool an ni a, season hmasaa league an thunun hneh dan leh khelh dan en chuan a awm lo hran lo - mahse, he team hian season hmasa an phak lo tih chu phat rual a ni lo. 

Reds hian chhuanlam erawh an nei ṭha a, Anfield chu player inhliam enkawlna hmun emaw tih mai tur a ni. Spurs lakah pawh Virgil van Dijk, Thiago Alcantara, Joe Gomez, James Milner, Xherdan Shaqiri, Naby Keita, Diogo Jota leh Kostas Tsimikas chu hliam vangin an inlan thei dawn lo. 

Player inhliam 'list' en ila, club dang pawhin an awh tak tak player an awm nual a, chhiatpui tham an ni tih chiang takin a lang. Fulham nena 1-1 a an inhnehtawkna inkhelah pawh hliam vangin centre back Joel Matip lakchhuah a ngai a, zaninah erawh dam hman tura ngaih a ni. 

Hetihlai hian Jose Mourinho erawh a vannei a,  Erik Lamela-a inhliam tih loh chu a squad aṭangin a player duh ang thlan tur a nei a, an ṭhat dan berin Anfield an lenglut dawn. 

Liverpool-in tun season-ah beisei an phak lo chungin hmahruaitu Spurs nen an point hmuh zat a la inang thei a, hei hian Merseyside club laka beiseina sanzia a pholang chiang hle. 

Spurs erawh team ṭha tak, coach ṭha tak hnuaia khel ni mah se beisei a sang lutuk lo a, an league match hmasa bera 1-0 a Everton an ngam loh nghal bawk avangin nuih an hlawh hman. 

Mahse, coach huaisen leh paukhauh Mourinho an nei miau a, Spurs an tho leh chiang hle - Everton hnua league match 11 an khelhah tlawm an nei tawh lo a, counter-attacking football chu 'style' hmuhnawmah an chantir. 

Liverpool lakah pawh Mourinho-a'n defensive game khelh leh a thlang ang tih a chiang a, a vaw let tura Son Heung-min leh Harry Kane an awm miau avangin Reds tan fimkhur a ngai ang. 

Liverpool-in game dangah beisei an phak loh pawhin Anfield-ah chuan a dan a dang ṭhin a, Spurs tan a harsa dawn - Anfield-a an league match hnuhnung 65-ah Liverpool an la tlawm miah lo. 

Reds hian match 65 chhung hian vawi 54 hnehna an chang thei a, vawi 11 an khingpui an inhnehtawkpui - an tlawm hnuhnung ber en tur chuan April 2017 thleng thlirlet a ngai a, Crystal Palace lakah 2-1 in an tlawm. 

Liverpool hian an home league match hnuhnung 32-ah vawi 31 hnehna an chang a, goal 93 khungin an lamah vawi 25 chiah a lut - he dinhmun an thlen theih nana tha thawhhlawk langsar Mohamed Salah, Roberto Firmino leh Sadio Mane-te an dam kim a, zaninah Spurs hneh loh an duh dawn lo. 

Hriat tel tur erawh a awm - Spurs hian khualmuala league match an khelh hnuhnung pakuaah tlawm an la nei lo a, tun season-ah Manchester United, Manchester City leh Arsenal an hneh tawh a, Chelsea lakah Stamford Bridge-ah point an hlawh chhuak bawk. 

Tun season Premier League-a forward inkawp 'hot' ber thlang dawn ila, tlar hmasa bera Kane leh Son dah an tam khawp ang - Spurs forward pahnih inkawp hian tun season-ah goal 12 an in 'khilai' dun tawh. 

Chumi awmzia chu Spurs goal 12 chu Kane leh Son-ten an in 'assist' tawh tihna a ni a, Premier League striker inkawp fuh ber pawl Alan Shearer leh Chris Sutton-ten 1994-95 season-a goal 13 an thawhchhuah dun record chu season chanve a tlin hmain an hnaih der. 

Son hian tun season-ah league match 12 khelin goal 10-a khung tawh a, assist vawi li a nei bawk. Kane hian league match 12-ah vek goal kua khungin assist vawi 10 a nei bawk a, VVD leh Joe Gomez awm lohna Liverpool tlarhnung an hmachhawn tur hi hmuh châkawm a tling. 

Liverpool hian goalkeeper ṭha mi Alisson Becker an chhawr leh thei tawh tih hriat tel erawh a ṭha a, tlarhmaah league match 11-a goal 10 leh assist vawi hnih neitu Mohamed Salah leh league match 11-a goal li khungtu leh assist vawi hnih nei thei Sadio Mane an awm tih hriat tel a ṭha bawk.