Sum seng hnem Magpies an chak thei lo

Player lakluh nana sum hmang hnem tak Newcastle United-in khelmual chhungah an duh ang result an la hmu thei lo a, Nilaini zan khan khualmualah Stoke City chu 1-0 in an hneh lo.

Britannia Stadium-a inkhelah hian team pahnih an inngam tawk a, first half-ah erawh goal hlauhawm an nei lo ve ve. Second half-ah Magpies khel ṭha zawk mah se goal khungtu erawh Stoke an ni.

Mualneitu team tan hian Xher-dan Shaqiri chuan minute 80-naah yard 20-a hla aṭangin a khung a, Magpies-in goal khung ngei tumin nawr let mah se Stoke-in Jack Butland an nei a, English keeper hian Seydou Doumbia tauh goal ngei tur nia ngaih chu ṭha takin a dang.

Stoke City-in Marko Arnautovic hmangin goal post pet per leh mah se goal dang erawh an khung thei lo a, 1-0 a chakin Stoke tan match thum chhung a zawna hnehna an channa a ni ta.

Magpies an ral

Newcastle-in February 13-a Chelsea 5-1 a an hneh loh hnuin match an la khel leh lo a, match khelh hah nei loin Stoke City khelmual an lenglut.

Mahse, ṭum dang ang bawkin Magpies-in beisei an phak lo a, Stoke khelmuala khaw vawt hnuai-ah goal an khung thei lo.

Newcastle hian tun season-ah khualmualah goal sarih chiah an la khung a, English football-a league pumpuia khualmuala tun season-a goal khung tlem ber an ni.

Magpies tan Stoke City an hneh loh hi league match 15 an tlawmna a ni ta a, tun season transfer bazar-a pound maktaduai 86.1 sengtu club tan result ṭhaa chhiar chi a ni lo.

Shaqiri tak tak

Stoke City fan-te'n goal an khung theih lawk loh avangin an rilru a buai hman ngei ang. Mahse, minute 80-naah Bayern Munich leh Inter Milan winger hlui Shaqiri a inlar a, Switzerland international hian Mame Biram Diouf ball pek
ṭha tak chu umin a khung chiang hle.

Potters manager Mark Hughes chuan, "Goal ropui tak a ni a, khatiang goal khung tur kha chuan tharum ngah a ngai a, a goal shot kha a ropui hle bawk. Magpies keeper khan tih theih a nei lo a ni," tiin a winger goal khung chu a fak.

Beidawng duh lo McClaren

Newcastle manager Steve McClaren chuan, "Ka player-te dem thei ka ni lo. Kan khel ṭhain player-te thawhhona a ṭha a, Stoke kha hun rei tak chhung kan chhaih buai a ni. Mahse, Potters lam khan chance vawi khat an nei a, an score a ni. Kan theihtawp kan chhuah chhunzawm chuan kan phu tawk result chu kan la hlawh chhuak em em ang," tiin an naute chu beidawng mai lo turin a fuih.

English manager chuan Potters keeper fak chhunzawmin, "Kar tina Jack Butland kan hmachhawn a ngai lo hi kan vanneihna chu a ni. St James' Park-ah amah vangin hnehna kan chang zo lo tawh a, zaninah point hlawh chhuah kan phu hlea ka hriat laiin kan point hmuh tur min chhuhsak leh a ni," tiin English keeper beiseiawm chu a fak hle.