Santosh Trophy 2016 Vawiinah Mizoram Vs Maharashtra
Santosh Trophy vawi 70-na chu Maharashtra-ah khelh mek a ni a, inlena thlengtu hian Jammu & Kashmir an hneh hnuah Mizoram nena inhnehtawk Railways an sawp. Vawiin tlai dar 3:00 hian Nagpur University Stadium-ah Maharashtra leh Mizoram an inhmachhawn dawn a, inkhel pawimawh a ni.
Group A inkhel pakhat zawkah Railways leh Services te SEC Railway Stadium-ah inhmachhawn dawn a, vawiin hian point la hmu lo awmchhun Jammu & Kashmir an awl ang.
Hmunruak pahnih
Mizoram awmna group-ah champion lai Services, Maha-rashtra, Railways leh Jammu & Kashmir te an awm a, group khat aṭang hian pahnihin semifinal an lut dawn. Maharashtra-in Assam an la hmachhawn loh avangin Mizoram an hneh chuan knockout stage an lut chiangah a ngaih theih ang.
Services-in an match hmasa berah Jammu & Kashmir goal khatin an hneh a, Railways laka point thum an hlawhchhuah leh theih chuan point ruk an hmuh tawh dawn avangin Mizoram dal thei tur team an ni.
Mizoramin point khat chiah an la hmu a, vawiina Maha-rashtra nena an inkhel result hian an hma lam hun a hril ang. Railways match hnih an khelh tawh aṭangin point khat chiah an hlawh a, an chak loh zawn chuan semifinal kawngka khar sak an ni an ni ang.
Table mawngphaha awm J&K an inlan dawn lo a, vawiin lam an awl hlauh avangin tla hmasa ber tur team an ni bik lo.
Intawnna hmasa
2013 Santosh Trophy Quali-fying Round I-ah Mizoram, Maharashtra leh Uttar Pradesh te chu group khatah an awm ho a, MPL ṭan chhoh hunlai a nih avangin Mizoramin beisei an nei sang hle.
Mizoramin match hmasa berah Maharashtra an inhma-chhawn a, 1-1 in an inhnehtawk. Group khat aṭangin pahnih tlang tur ni mah se Uttar Pradesh an hneh loh avangin an tla nghal.
Kum 2014-ah Mizoram leh Maharashtra te hi final round-ah an intawng leh a, Lal-nunmawia leh Lalfakzuala te goal hmangin Mizoramin 2-0 in hnehna an chang. Maharashtra hian Mizoram hneh lo mah se Mizoram hnung zuiin semifinal an lut tho a, Mizoramin a vawi khatna atan champion nomawi an chawi a, Maharashtra erawh semifinal-ah Railways penalty shootout-a hneh loin an tla.
Nikumah Mizoram leh Maharashtra ten final round lut ve ve mah se group khatah an awm lo a, semifinal-ah Mizo-ramin inelna thlengtu Punjab an hneh lo. Maharashtra-in an group-ah Assam chiah an hneh a, knockoutstage an thleng zo lo.
A thlengtu nge nge
Maharashtra hi inelna thlengtu an nih angin Nagpur University Stadium-ah training an nei thei a, champion ngei tumin inbuatsaihna an nei ṭha hle.
Vawi li champion tawh Ma-ha--rashtra hian I League club Mumbai FC an kawl a, India ram league sang bera khel tawh Air India leh Mahindra United te innghahna state an nih avangin player tawnhriat nei
ṭha an kawl hnem hle.
Maharashtra-in 3-1 Jammu & Kashmir an hneh ṭumin Shrikant Veramullu-a'n goal hnih a khung bakah Raynier Fernandes-a'n goal a khung a. Railways an sawp ṭumin Vijith Shetty, Mohammed Shabaz Pathan leh Aaron D'costa ten Maharashtra tan goal an khung.
Match hnih leka Maharash-tra tana goal khungtu zat hi player panga an ni a, an squad a chhah ṭha tawk tih a chiang hle.
Mizoram ve thung
Mizoramin match hmasa berah besei ang result an hlawh chhuak lo a, Railways lakah injury time-a Malsawmfela penalty hmangin point khat an hmu hram.
Maharashtra an hmachhawn hunah Mizoram tana phurna tur chu K. Lalṭhathanga (Puitea) leh Lalliansanga (Notea) ten an telh belh dawn. Mizoram coach HC Zarzoliana chuan MPL4 best midfielder Puitea chu bul ṭan tir nghal an tum thu Vanglaini palai a hrilh.
Mizoram coach Zara chuan, "Railways leh Maharashtra inkhelh ṭum kha kan thlir a, kan hmachawn tur team hi an ṭha tih kan hmu a, hneh theih loh erawh an ni lo. Maharashtra hian field an hrechiang a, an len ṭhat avangin an tlarhnung pawh a phui ṭha hle. An khelh dan hmang hi Mizoram khelh dan nen a inang lo a, ani chuan muang dupin an khel a, khelh thiam an harsa phian ang," tiin a sawi.
Mizoram boss chuan point thum an hmu lo a nih chuan tla thei dinhmuna an din tur thu sawiin chak tuma attacking football an khelh tur thu a sawi.
Ṭantu lam thung
Nagpur Mizo Welfare-te'n Mizoram team an ṭawiawm theih nan vawiina Chapchar Kut nei tura an ruahmanna siam chu naktuka hman turin an sawn. Mizoramin an match hmasa bera Railways an draw ṭumin Nagpur leh a chhevela Mizo mipui ṭawiawmna a ṭha a, hun tawpa goal an khung theih nanna kawngah an thawh hlawk hle.
Mizoram coach Zara chuan, "Nagpur Mizote ṭawiawmna hi rin phak bak a ni a, an chungah kan lawm takzet. Mizoram tana theihtawp kan chhuahna kawngah anni hian phurna nasa tak minpe a ni," tiin Vanglaini palai a hrilh.
Group B lam
Nimin khan West Bengal-in semifinal beiseina nei turin Punjab chu 1-0 in an hneh a, inkhel dangah Goa-in Assam chu 1-0 a hneh bawkin Group B hmahruaitu an ni.