Chak mamawh Chaltlang Ryders

Chaltlang Ryders-in Mizoram Super League1-ah match 10 an khelh aṭangin vawi khat chiah hnehna an chang a, MSL2-ah match hnih khel leh tawhin chak ni hmel an la hmu lo. Tuikual South lakah an chak lo leh a nih chuan beisei tur a tlem tawh dawn.

Vawiin tlai dar 4:00 hian Ryders leh Tui-kual South-te hi Hawla Indoor Stadium, Republic Vengthlangah an inhma-chhawn dawn a, result
ṭha neih mamawh Ryders hian an player-te au phur tur fans an mamawh.

MSL-ah Tuikual hian Ryders hi vawi hnih an inhmachhawnah an hneh ve ve a, an huphurh lo ang. Season hmasaah Tui-kual hi pathumna ni mah se tun season-ah erawh champion tumin an inbuatsaih a, an match hmasa berah Zarkawt BCA an hneh nghal. He mi ṭum hian power forward Vanchuangpuia leh captain F Zodinthara an khel ṭha a, anni pahnih point score belhkhawm chu point 31 lai a ni.

Ryders hian an match hnuhung bera che ṭha Delhi tlangval Rachit chu an innghahna tur a ni leh dawn a, ani hian Serpents lakah point 18 lai a score bakah rebound vawi ruk a la thei. Ani bakah hian power forward H Lalthangliana chu team khai dingtu a ni ang.

Eng nge an sawi?

Vanglaini palai zawh-na chhangin Tui-kual South coach KC Lalliantluanga chuan, "Champion sawi hun a la ni lo a, nomawi chawi tur chuan vanneih a ngai tel. Mahse, final luh ngei erawh kan tum a, chumi tur chuan Ryders lakah pawh hian hnehna chan ngei kan in beisei. Kan innghahna ber chu player-te fitness ṭha hi a ni a, kan inbuatsaihna a ṭhat avangin kan inringtawk," a ti.

Chaltlang Ryders asst. coach Peter Lalrintluanga chuan, "Thi leh dam kara leng kan ni tawh a, tunah hian kan squad-ah player 13 chiah chhawr tur kan neih avangin kan tan hun harsa a ni mek. Mahse, defending lam kan in zir nasa a, kan hlawhtlin ve theih tawh ngei pawh ka beisei," tiin Vanglaini palai a hrilh.

MSL2-ah hian team parukte vawi khat ṭheuh an inkhelh kual hnuah a sang paliin semifinal an khel dawn a, a hniam pahnih chuan relegation playoff an khel dawn a ni. Division hniama tlak thlak theih a nih tawh avangin match tin hi a pawimawh a, final tluk zeta pawimawh vek a ni.