Monaco ngam loh Kylian Mbappe

Kylian Mbappe chuan amah siam liantu AS Monaco lakah zahngaihna a lantir lo. French forward hian a club hlui lakah goal hnih khungin Paris Saint-Germain chu 4-1 in hnehna a chanpui.

Nilaini zan Ligue 1 inkhelah Mbappe bakah Neymar leh Pablo Sarabia ten goal an khung a, mualneitu Monaco lam goal neih chhun hi hun tawp dawna Tiemoue Bakayoko khung a ni - midfielder goal khung hian an mualpho a hliahkhuh zo lo.

Club pahnih hi Thawhṭanni mai khan Parc des Princes-ah 3-3 in an inhnehtawk a, league match an khelh kim loh siamremna inkhelah erawh champion lai PSG an chungnung ta zawk. France international Mbappe hian 2015 aṭanga 2018 chhung kan Monaco tan hian a lo khel tawh a, a season hnuhnung berah phei chuan league nomawi a chawipui hial.

Paris club lian a zawm a, PSG tan pawh rinrawl leh player pawimawh a ni chhunzawm zel. Season kal laiah pawh match 14 a khelh aṭangin goal 13 a khung leh tawh a; goal khung hnem lamah Monaco hmatawng Wissam Ben Yedder (14 goals) chiah a chungah a awm. Thomas Tuchel-a naute hian league match 20 khelh aṭangin point 49 an hmu a, an mahni hnaih bertu Marseille lakah point riat zeta sang fal chungin hma an hruai mek. Pathianni zan dar 1:25 hian Lorient an len chilh zui leh nghal ang.