North London Derby Nomawi inchuh Tottenham vs Arsenal
Zanin tlai dar 6:15 hian North London Derby a awm dawn a; Premier League champion nih tum Tottenham chuan an elpui leh hmelma kumhlun ni bawk Arsenal chu White Hart Lane-ah an lo mikhual dawn.
Tottenham leh Gunners inkhel hi eng hun leh hmunah pawh nise a boruak a sang ṭhin. Spurs hian an club chanchina league-a an chet ṭhat ber ṭum an tawng mek a, point 54 hmuin champion thei dinhmunah an ding. Zanina an khingpui tur ai hian point thuma an san zawk avangin North London Derby awm tawh a zawnga ngaihven hlawh ber tur ang hiala sawi a ni.
Kar laihawl inkhelah Totten-ham hi West Ham lakah 1-0 in an chak lo a, a zawna league match ruk chhung hnehna an chan tawh chu a tawp rih. Hetihlai hian Arsenal pawhin boruak ṭha an nei bik lo. Manchester United an hneh loh hnuah Swansea City an hneh lo zui leh a, khualmuala league match an khelh hnuhnung pariat aṭangin vawi hnih chiah hnehna an chang thei.
Arsenal hian tun season-a a sang pali bik an hmachhawn tawh aṭangin point an la hlawh chhuak ṭha ber a, point 10 an hmu tawh. Hetih lai hian Spurs pawhin a sang zual pali lak aṭangin point riat an hmu ve tawh a ni.
Nikum September thla khan White Hart Lane-ah hian League Cup-ah an lo intawng tawh a, Mathieu Flamini goal hmangin Arsenal-in hnehna an chang. Season tir lam khan Emirates Stadium-ah league match an lo khel tawh bawk a, Harry Kane goal khung chu Kieran Gibbs-a'n sut hramin 1-1 in an inhnehtawk.
Cech tel loin
Arsenal goalkeeper Petr Cech hian tun season-ah league match 28 a la khel kim vek a, mahse Chelsea keeper hlui hi a ṭhâl na vangin zanin hian a inlan thei dawn lo a, David Ospina chuan a hmun ruak a luah ang. Defender Laurent Koscielny pawh châwn na vangin a inlan thei dawn lo bawk a ni. Tlarhnung phui tawk lo Gunners tan inrem fuh a ṭul ang.
Tlarhnung phui ṭha
Spurs hian tun season league match 28 an khelh tawh aṭangin goal 22 chiah an la chhuah a, tun dinhmunah chuan tlarhnung phui ber team an ni. Anni tih lohah chuan Manchester United (26) leh Gunners (28) te hi record nei ṭha an ni.
Arsenal tan Tottenham laka goal khung hi a awlsam dawn lo tih a chiang a, mahse team pahnihte inelna hrang hrangah an intawn hnuhnung vawi 42-ah Gunners hian Spurs lakah goal 41 an khung thei tih hi theihnghilh chi a ni lo thung.
Eng nge an sawi?
Tottenham head coach Mauricio Pochettino chuan, "Match 10 khelh tur a la awm a, point hmuh theih leh hloh theihna hun a la tam. Tunah hian kan squad kan ṭha tawk a, inrintawkna pawh kan nei. Inkhelh hmabak kan neih zingah chuan zanin hi a pawimawh ber hial ang," tiin a sawi.
Arsenal manager Arsene Wenger chuan, "Inkhel result tur rinthiam a harsa a, title inchuhna inkhel ang maia pawimawh a nih tawh avangin finkhur a ṭul. A chang chuan football hian min ṭah tir ṭhin a, a bikin Premier League-ah phei chuan beisei loh result a thleng nasa hle. Team
ṭha lo nia ngaih lakah pawh kan chak lo fo a, zaninah erawh team ṭha kan tum dawn a point hmuh kan tum ang," a ti.