England team-ah Rashford tan hmun a awm

Tun hnaia Manchester United tana che ṭha tak Marcus Rashford-a'n thawm a nei zel a, England manager Roy Hodgson chuan Euro 2016 squad-ah kum 18-a upa forward tan hian hmun a awm thu a sawi.

England Under-18 tan chiaha la inlan Rashford chungchang hi sawiin Roy Hodgson chuan, "Rashford hi England tana khel tura koh a ni thei a, kan ko lo thei tho bawk. Kei chuan ka duh ber chu ṭha takin khel zel se tih hi a ni. Kum hnih chhung Rashford hi ka en thla tawh a, ka player duhzawng tak a ni," a ti.

Liverpool boss hlui chuan sawi chhunzawmin, "Rashford hi kum 18 leka upa a nihna ang ngeiin hmasawnna hun kan siamsak tur a ni a, boruak sang tak hnuaiah mipuiin an dah ang tih hi ka hlauh ber a ni. United tan match li-a goal thum khung hi a ropui a, a chhunzawm zel theih chuan Manchester leh England tan a ṭha a ni," tiin Rashford chu che ṭha zel tura a duhthu a sawi.

Hetihlai hian Hodgson chuan tun season-a Arsenal tana la inlan lo midfielder Jack Wilshere tan England Euro 2016 squad-ah hmun a la awm thu a sawi bawk.

England hian tun thla chhungin friend-ly match-ah Germany leh Nether--lands an hmachhawn dawn a, France rama Euro 2016 khel tura an inbuat-saihna tur a ni.

Season ṭan hmaa inhliam Wilshere chungchang hi sawi chhunzawmin Hodgson chuan, "Ka tan chuan player in fit leh fit loh emaw, an khelh tam leh khelh tam loh aiin an class a pawimawh zawk," tiin England tana vawi 28 inlan tawh midfielder chungchang a sawi.