Nuai 10 chawi tura hrem Bagan coach
AIFF Disciplinary Committee chuan Mohun Bagan coach Sanjoy Sen chu a ṭawngkam mawi lo avangin nuai 10 chawi turin an hrem a, match riat chhung a team enkawl thei lo tura an tih bawk avangin tun season-ah a hmel a lan thei dawn tawh lo.
Hremna chhan
January 30 khan Mohun Bagan hi I League-ah DSK Shivajians nen inhmachhawn tura tih an ni a, February 2-ah AFC Champions League khel tura China-a an zin a ngaih bawk si avangin an league match khelh hun hi sawn an dil.
AIFF lamin Mohun Bagan dilna hi an pawmsak lo a, season hmasa I League-a Kolkata club champion puitu coach hian hei hi hrethiam loin AIFF chu na takin a sawisel.
Sanjoy Sen-a ṭawngkam
Kum 55-a upa coach hian, "Engtinnge hetiang hi India-ah a thlen theih tih hi ka hriatthiam loh chu a ni a, khawvel hmun dang khawiahmah a thleng ngai lo. Barcelona hian league match leh Champions League match inhnaih taka an khelh in la hre ngai lo ang," tiin an inkhelh hun sawn sak an nih loh chungchangah ṭawngkam a lo nei tawh.
Prayag United pawh lo enkawl tawhtu coach hian a la duhtawk mai lo. AIFF chu na taka khak letin, "AIFF hian kan thusawite an hre lo tih ka hria a, hei hi India rama football kaihhruai a nih dan chu a ni. Kan dilna pawm a nih loh chhan hi Pathian chauhin a hria. Kan tan chuan AIFF thutlukna hi a vanduaithlak a, hmathlir thui tak nei eng team tan pawh a pawi vek a ni," a ti.
Bengali coach chuan sawi chhunzawmin, "AIFF hian football hmasawnna an ngaihtuah tur a ni a, football hruaitu pawl zahawm tak hi tute emaw thuhnuaiah a kun tawh a ni. Pune-ah kan kal ang a, a hnu lawkah China kan pan lehnghal a ngai. Duhthusam result kan hlawh chhuak lo a nih chuan keimah chauh hi min dem leh lawi si ang," tiin a lo sawi tawh bawk.
Thutlukna chu
Sanjoy Sen-a'n na taka AIFF a sawisel hnu lawkah India rama football thuneitu sang ber hian Mohun Bagan coach hi a thusawi chungchanga insawifiah turin an ti a, ngaihdam dilna hun chhung atan ni sarih chhung hun an pe.
Bengali coach hian a thusawi vanga hremna a pumpelh inbeiseiin AIFF hnenah hian ngaihdam a dil a, a ṭawngkam hman dan chungchangah hriatthiamna a dil.
Mahse, AIFF lamin insawifiah tura phut siin Sanjoy Sen-a insawifiahna an pawmsak lo a, nuai 10 chawi tura an tih bakah match riat chhung a team a kaihruai thei dawn ta lo.
AIFF chuan, "Mohun Bagan head coach Sanjoy Sen chuan AIFF sawisel zawngin
ṭawngkam mawi lo tak a hmang a. AIFF chuan Sanjoy Sen hi a ṭawngkam vang hian match riat chhung a team kaihruai thei lo tur leh nuai 10 chawi turin AIFF Disciplinary Code-a Article 58 behchhanin hremna Kan pe ta a ni," tiin thuchhuah an siam.
Hmabak
Mohun Bagan-in tun season-ah league match 10 an khel tawh a, team pakua inelna I League-ah match ruk chiah khelh tur an nei tawh.
Sanjoy Sen hian tun season chhung a naute a kaihruai thei tawh dawn lo tihna a ni a, season thara I League match hnihah team a kaihruai thei lo bawk ang.
Kolkata club hian I League-ah hmahruaitu dinhmun luah mekin point 22 an hmu mek a, khelh zat inangah an hnuai chiaha awm Bengaluru aia an sanna chu point khat chiah a ni.
March 26-a RG Stadium-a Aizawl FC hmachhawn tur team hian Mizo club bakah hian Mumbai F.C, East Bengal, Shillong Lajong FC, DSK Shivajians leh Bengaluru FC-te an la hmachhawn leh dawn a, coach tel loa Kolkata derby an khel tur leh an elpui Bengaluru an mikhual tur hi a pawi thui thei.
Rime an hrem
AIFF-in Sanjoy Sen mai an hrem lo a, Shillong Lajong goalkeeping coach Gumpe Rime chu an hrem bawk. Arunachal Pradesh lam chhuak Mahindra United keeper ṭhin hi referee laka a chet mawi loh avangin match li chhung hrem a ni a, Rs. 30,000 chawitir a ni bawk.