Federer hma hun a chiang lo

Roger Federer chuan a khup vei lam an zai chu a beisei angin a dam chak lo tih a sawi a, nakkum January thlaa khelh tur Australian Open atan a dinhmun a chiang ta lo niin a sawi bawk.

Swiss star Federer hian kumin Australian Open semifinal-ah khan Novak Djokovic a ngam lo. A hnu lamah hri leng vangin tournament khelh tur a awm mumal lo a, a khup zai a nih bawk avangin tun thlengin a la inkhel leh lo.

Nakkum August thlaa kum 40 tling tur Federer chuan, "October thla khan 100% in inkhel tura inpeih ka beisei a ni a, mahse tun thlengin chutiang chu a la thleng thei si lo. A nihna tak sawi chuan Australian Open hi ka tan a chawpchilh lutuk tawh mai thei.

"A vawi hnih nana khup hliam zai meuh chu a namai lo khawp mai, tennis court chhunga kir leh beiseina pawh a tla hniam hman. Mahse tun hnai thla ruk chhungin hma ka sawn ve zel, tunah chuan dawhthei taka ka taksa dinhmun ngaihchan hi ka tih theih chu a ni," a ti.

Ruahman lawk dan chuan Australian Open 2021 hi January 18-31 chhung hian Melbourne Park-a khelh tur a ni. Mahse hri leng vangin a hun hi tih chian theih a la ni lo a, media lam chuan February thlaa khelh tur angin an sawi ve mek bawk.

World number 1 hlui Federer hian Grand Slam nomawi 20 zet a chawi tawh a, major title lak hnem lamah Rafael Nadal nen an in zat mek. Player pahnih hi an la chawlh loh avangin tennis inelna hmuhnawm an chhawpchhuah leh ngei a rinawm.