Mipui thlir rawn Leicester

Premier League match 10 chauh khelh tur a awm tawh a, rin loh taka a chung bera awm chu Leicester City an ni.

Foxes hian zanin dar 11:00 hian Vicarage Road-ah Watford an hmachhawn dawn a, an hming en mai chuan relegation battle tih theih tur ni mah se Claudio Ranieri hote hi hmahruaitu an nih miau avangin en liam mai theih an ni ta lo.

Leicester City hi Arsenal lak-ah vanduai mah se Tottenham Hotspurs, Liverpool leh Manchester City-te an hneh avangin fiahna hmasa an paltlangah a ngaih theih.

Tunah hian Leicester-in an budget mil pui club an tum chho a, fiahna vawi hnihna hi point hloh theihna tur a ni. Season liam ta khan Southampton-in season bul an ṭan
ṭha a, season tawp erawh an daih lo. Saints hian vawi 28 khelhah point 49 hmu tawhin match hnuhnung 10-ah point 11 chiah an hlawh chhuak.

Leicester hian season khar hmain Chelsea leh Manchester United-te an la hmachhawn dawn a, chuvangin Watford lakah point hloh a thiang lo. Italian boss Ranieri hote hian an match hnuhnung berah West Bromwich Albion draw mah se mak tak maia Tottenham Hotspurs, Arsenal leh Manchester City-te an chak loh vek avangin an vannei hlauh.

Leicester khingpui tur Watford hian an match hnuhnung pangaah Crystal Palace chiah an hneh a, vawi hnih chak loin an chak lohna zat erawh goal khat ve ve chauh a ni. League match 19-a goal 13 khung tawh Odion Ighalo-a'n kuminah goal khat chiah a la khung a, Hornets-in result ṭha an neih theih nan Nigerian striker chet ṭhat a pawimawh hle.

Premier League-a vawi thum an inhmachhawn tawhah Foxes an la tlawm lo a, November thla khan King Power Stadium-ah 2-1 in hnehna chang bawk mah se Hornets (Watford kohna) lakah Leicester hian point thum an hmu chiang lo.