Zaninah I League relegation battle

India rama club football inelna sang ber I League a ngaih-nawm chho zel a, vawiin tlai dar 4:30-ah tlak hlau Salgaocar leh Mumbai FC an inhmachhawn dawn. Goa-a inkhel tur hi Ten Action-in live-in an pe chhuak ang.

Mumbai FC-in an dinhmun hre-chiangin player tawnhriat nei ṭha la lut nual mah se Aizawl FC nen 2-2 a an inhnehtawk avangin tla thei dinhmuna ding mek Salgaocar nena an inthlauhna hi point thum chauh a ni.

Pathianni zanah inkhel pahnih a awm dawn a, champion beisei team pahnih Bengaluru FC leh East Bengal-te khualmualah an zin ang. Bangalore club hian Sporting Goa an lenchilh ang a, DSK Shiva^-jians khelmualah Kolkata club an lenglut thung dawn a ni.

Bengaluru-te inkhel a en theih dawn lo a, Pune khawpuia East Bengal-te inkhel erawh Ten Action-ah en theih a ni thung dawn.

Ashley Westwood-a naute tan Sporting Goa hi zuam sual theih an ni dawn a, Mohun Bagan inhnehtawkpuitu team hi an chhe lo. East Bengal-in an match hnuhnung berah Salgaocar an zuam sual tawh a, DSK lakah chetsual nawn an duh lo ang.

I League-ah team pakua chiah an awm a, DSK Shivajians an relegate theih loh bakah Mohun Bagan, Bengaluru leh East Bengal te tla turin an ṭha lutuk bawk. Pathumnaa awm mek Sporting Goa bakah Mumbai FC, Shillong Lajong, Aizawl FC leh Salgaocar te hi tla thei vek an ni.