Club thuneituten Arteta an thlawp

Arsenal technical director Edu-a'n an manager Mikel Arteta chuan ṭha takin hna a thawk tih a sawi a, tun hnaia sawisel hlawh Spanish manager hi a hna aṭangin an la ban mai dawn lo niin a lang.

Gunners hian tun hnai kum 46 chhunga season bul an ṭan chhiat ber ṭum an tawng mek. Burnley an ngam loh chiah khan 1959 hnu lama a vawi khat nan league match bikah a zawnin vawi li an tlawm - a chhe zawngin record an siam mek zel a ni ber.

Emirates Stadium a an inkhel hnuhnung ber kha a hmuna entu 2000 an awm thei a, inkhel entu tam lo mah se manager Arteta an auh elna ri chu ring tak a ni. Boruak ṭha lo tak karah Arsenal chanchin hrechiangtu pakhat chuan an manager dinhmun hi a him thu a sawi.

Arsenal player hlui, July, 2019 aṭanga technical director nihna chelhtu Edu chuan, "Mikel hian ṭha takin hna a thawk a ni. Inkhel result avanga lungawi lo an tam hi a mak lo, amaherawhchu nakin hun lo kal tur atana thil ṭha a ti mek.

"Player naupang engzatin nge khelhna hmun chang a, engtiang takin nge an hma hun an siamrem mek tih chu chhut tham a ni," a ti. North London club hi Premier League table-ah 15-na an ni mek, relegation zone aṭanga an himna chu point nga chauh a ni.

Fans tam takin Arteta hi chhuak turin an duh thu an tlangaupui. Hetihlai hian Manchester City manager Pep Guardiola chuan a assistant hlui hi thawhpui leh a hreh loh thu a sawi ve leh tawh bawk.

Guardiola chuan, "Manager ka thawhpui tawhah chuan a ṭha ber zinga mi a ni. A theihna leh thiamna ka hria a, Arsenal hi an phu tawk ang dinhmun thlenpui turin a ṭha tawk, ani aia ṭha hi club enkawltu tur an awm chuang lo," a ti.

Gunners hian zanin dar 11:30 hian Emirates Stadium-ah Southampton an mikhual dawn a, Saints hi palina dinhmun luah mektu an nih avangin awlsam taka lo dawnsawn chi an ni dawn lo, an mangchhia belhchhahtu ni thei tur an ni ang.

Britain sorkar inkaihhruaina danah an ram chu hlawm hrang hranga ṭhen hran an ni, Arsenal hi a tirah chuan hri leng hlauhawm nepna zingah telin a hmunah entu 2,000 an awm thei. Mahse, tunah chuan London khawpui chu hlauhzawm zinga an tel leh tak avangin zaninah entu an awm lo ang.