NECS CUP 2016 A thiam 16 a hriat ta

Team 87 inziak lut aṭang-in a thiam 16 chiah an bang tawh a, Aizawl DFA buatsaih NECS Cup 2016 chu Thawhlehni zan hian Ignite studio-ah last 16 intum tur pawh a ni dawn; LPS-ah live a pekchhuah a ni ang. He hunah hian team tin aiawh mi pahnih ṭheuh kal tura hriattir an ni.

NECS Cup hi a tirah chuan Aizawla khelmual pathum Lammual, Ram-hlun Sports Complex leh Republic Veng Khel-mualah-te khelh ṭhin a ni a, last 16 aṭang hi chuan inkhel zawng zawng hi Lammualah vek neih tawh tur niin LPS-ah live a ni bawk ang.

Inrinni chhuna in-khelah Mizoram Premier League season-5 club khel tur club nei thar hlim Chhinga Veng chuan Rochharzela hattrick hmangin Zonuam an sawp a, inkhel pakhat zawkah Salem Veng chuan 2-0 in Tlangnuam an hneh ve bawk.

Chhinga Veng leh Salem Veng-te hian last 16-a hmun ruak pahnih la awm an hnawhkat chiah a, anni veng pahnih bakah hian champion lai Armed Veng, Armed Veng South, Bethlehem, Bethlehem Vengthlang, Chanmari West, Chite Veng, Dur-tlang Leitan, Khatla, Model Veng, Mission Vengthlang, Ramhlun South, Vaivakawn leh Venghlui bakah Aizawl khawpui pawn team awm chhun ni turin Keifang te chuan pre-quarterfinal hi an lo lut tawh a ni.