Hamilton-a'n contract ziak dawn?

Car intlansiakna sang ber Formula 1 season kal lai a zo a, tunah chuan driver champion Lewis Hamilton hma hun chu sawi hlawh ber a ni ta. Britain tlangval hian Mer-cedes tan contract thar a ziak dawn niin a lang.

World champion vawi sarih ni tawh Hamilton leh Mercedes inremna hmasa chu season tawp rual khan a zo a, contract thar an la ziak leh lo. A duh a nih chuan team thar a zawm thei, chutihrualin a team awm mekna hi midang aia che ṭha lai an nih avangin a chhuak kher lo thei bawk.

Season kharna Abu Dhabi Grand Prix an tlan zawh khan Hamilton chuan, "Nakkumah chuan he hmunah hian ka la awm leh ang, chutiang tur chuan ruahmanna ka siam. Kei leh ka team hian he infiamna tan hian sulhnu ropui hnutchhiah zel kan duh," a ti.

Mercedes lam chuan an driver hi chelh an duh thu an lo sawi fo tawh, tun hnaia hetiang thu a sawi hi team lam tan chuan chanchin ṭha a ni dawn. Chutihrualin Hamilton chelh tur chuan a hlawh atan sum an thehchhuah tam ngam a ngai dawn tih a chiang.

Team boss Toto Wolff chuan, "A hma pawhin kan sawi tawh a, tunah ka sawi nawn leh ang. Lewis leh Mercedes hian contract thar ziah kan duh, amaherawhchu champion nomawi chawi phawt kha kan duh a ni.

"Nomawi chawi hnuah pawh hri leng vangin buaina a awm leh a, tunah chuan inbiakna pawh tluang taka neih theih a nih kan beisei," a ti. Hamilton-a'n hri leng a kai a, intlansiak vawi khat a tlan theih loh hnuah a hnu kharna erawh a hmang thei leh tawh.