National Level North East Games - Mizoram Dinhmun. North East Games-ah Mizoram pahnihna

National Level North East Games chu March 3 aṭang khan Manipur-a Khuman Lampak Main Stadium-ah neih ṭan niin nimin tlai khan a kharna hun hman a ni. Mizoram team chuan gold 17, silver 19 leh bronze 11 lain inelna pumpuiah pahnihna an ni a, infiamna khawmpui lian thlengtu Manipur chuan gold 41 lain pakhatna an ni.

Inelnaah hian medal tally hmang loin point hmanga cham-pion zawn a ni a, Manipur hian a pumpuiah point 310 hmuin Mizoram hian 164 an hmu a, pathumna Tripura chuan 122 an hmu ve bawk.

NE Games-ah hian state pa-riat Manipur, Mizoram, Tripura, Nagaland, Arunachal Pradesh, Assam, Meghalaya leh Sikkim-te chuan infiamna chi hrang hrang pariat hmangin intihsiakna an nei a. Mizoram aṭang hian infiammi 138 bakah official 15 kalin inelna zawng zawngah hian an inlan kim vek.

Vanglaini palai zawhna chhangin chief-de-mission H. Thangchungnunga chuan, "Mizoram sorkarin infiammite hmasawn nan sum leh pai tam tak sengin NE games a hlawhtlin theih nan hma a la a, kan duhthusam ang diak diak chuan thil thleng lo mah se kan thlen chinah kan lawm hle a ni," tiin a sawi.

Thangchungnunga chuan sawi chhunzawmin, "Sports department hrang hrang bakah player nu leh pate chungah lawmthu kan sawi a, zirlai exam lai a nih vangin kan duh ang hruai vek thei lo mah ila phal taka an fate kaltirtu chungah hian kan lawm tak zet a ni," tiin a sawi. Thanga hian NE Games thlengtu Manipur official-ten duhthu an sam tawk loh thu a sawi tel bawk.

Mizoram hian kum 2012-a NE Games a thlen kumah gold 55, silver 25 leh bronze 105 zet a dawng a, chiang takin pakhatna a ni. Kum 2013-ah inelna thlengtu Manipur an che ṭha a - gold 74, silver 31 leh bronze 22 laiin a vaiin medal 127 a la a, pa-thumnaa awm Mizoramin gold 20, silver 19 leh bronze 33 lain Manipur an pha lo hle.

Kum 2014-ah Arunachal Pradesh khawpui Itanagar-ah nghah niin Manipur cheṭha berin gold 37, silver 24 leh bronze 28 an la a, Mizoram hian hemi ṭum hian gold 20, silver 27 leh bronze 34 lain Manipur, Arunchal Pradesh leh Assam-te phak loin palina an ni.

Mizoram hian kum 2016-ah pahnihna dinhmun an hauh let a, an gold lak zatah erawh inelna hnuhnung bera an lak zat aiin a tlem zawk.