Champions League Thlirlawkna Roma mikhual tur Real, Wolfsburg khelmualah Gent
Zanin dar 1:15-ah Real Madrid-in Champions League last 16 second leg match khel turin AS Roma an lo mikhual dawn a, khualmualah 2-0 a an lo chak tawh avangin Spanish club dinhmun a ṭha hle.
VfL Wolfsburg khelmualah Belgian club Gent chu zanin dar 1:15-ah tho an lenglut dawn bawk a, Gent-in first leg-ah Wolfsburg 3-2 an hneh zawh loh avangin last 16 paltlang turin German club lakah goal hnih tal an khung a ngai tawh dawn.
Roma zinkawng
Roma-in January 25-a Juventus an hneh loh hnuah match riat khelin vawi khat chiah an tlawm a, an hneh loh awmchhun chu Real Madrid an ni.
Champions League last 16 lut turin zaninah 3-0 tala an chak a ngai dawn a, an lenluhna tur Santiago Bernabeu-a Champions League match an khelh hnuhnung 33-ah Real-in vawi 28 hnehna an chan theih avangin Italian club zinkawng hi a awlsam dawn lo.
Mahse, Roma-in Real an hmachhawn hmaa an match hnuhnung berah Fiorentina chu 4-1 in an sawp a, an phur vanglai tak a ni.
Roma midfielder Miralem Pjanic chuan, "Madrid-ah hian a ṭha thei ang bera khelhchhuah tumin kan zin ang. Santiago Bernabeu-a chak hi a harsa dawn tih kan hria a, mah se kan theihtawp kan chhuah ang. Player zingah hliam vanga talbuai kan awm lo a, khelmual chhunga kan tihtur chu kan hre vek a ni," tiin Real khelmualah chak result hlawh chhuah ngei an tum thu a sawi.
Tho leh Real
Real-in Madrid Derby-a Atletico Madrid 1-0 a an hneh loh hnuin an tho lehnghal a, Levante 3-1 a hnehin Celta Vigo 7-1 in an sawp zui a, Santiago Bernabeu-ah khualmuala 2-0 a an hneh hnu Roma lo mikhual hi an huphurh lo ang.
Spanish club tan striker Karim Benzema la inhliam mah se Gareth Bale-a'n a inhliam hnua a match hmasa berah a dam tawh tih tilangin Celta Vigo lamah goal a khung lehnghal a, Celta lama goal li khungtu Cristiano Ronaldo an la neih cheu bawk avangin striker pakhat inhliam hi Real manager Zinedine Zidane-a tan lu ti hai tham a ni lo.
Kum 2007-08 season khan Champions League last 16-ah team pahnih hi an lo inhmachhawn tawh a, a tlang zawkah Italian club an ṭang. Real-in an thawnthu hlui duhawm lo hi thai bo an duh ang a, Roma-in chhunzawm an tum thung ang.
Hnuhma ropui
Zaninah Wolfsburg-in Gent an mikhual dawn a, team pahnih hi Europe-a team
ṭha zinga sawi an nih ngai loh avangin Champions League-ah sulhnu an nei ṭha lo.
Wolfsburg leh Gent tan tun season hi Champions League last 16-a an luh hmasak ber a ni a, Gent hi Belgian club zinga Champions League knockout stage in petkai thei hmasa ber an ni bawk.
Zanin hi club pahnih tan hnuhma ropui hnutchhiahna remchang a ni a, an thlen chin apiang hi an club tan sulhnu thar zel a nih dawn avangin club history ziak ṭha turin tun hi club pahnih tan hun ṭha a ni.
Wolfsburg-in an squad-ah player ṭha Julian Draxler, Andre Schurrle, Luiz Gustavo leh Bas Dost-te ho an nei a, khualmuala an hneh hnu Gent mikhual hi an huphurh lo ang.
Gent-in an match hnuhnung pangaah vawi hnih chiah chak hmel an hmuh avangin an phur vanglai a ni lo a, German club laka hnehna chan hi an tan a harsa dawn.