Barcelona chak chiang; Atletico an kal zel

Pathianni zan La Liga inkhelah hmahruaitu Barcelona chuan 4-0 in Eibar an sawp a, Barcelona tan an dan pangngaiin Lionel Messi leh Luis Suarez-te'n goal an khung.

Atletico Madrid pawhin Barcelona an um ve zel a, tun hnaia che ṭha Valencia chu khualmualah 3-1 in an hneh. Mikhual team tan substitute Fernando Torres chuan goal a khung ve leh ta a, tun season-a goal nga a khungna chiah a ni.

MSN=100

Barcelona-in inkhel ṭan aṭanga minute 8-na lekah goal hmahruai an khung nghal a, goal khungtu hi kum 20 leka upa Munir El Haddadi a ni.

Catalan club tan Messi-a'n goal hnih a khung chhunzawm ve leh a, a goal hmasa zawk hi minute 41-naa a khung niin goal hnuhnung zawk hi minute 76-naah penalty aṭanga a khung a ni thung.

Minute 84-naah Barcelona goal lina Suarez-a'n a khung ve leh a, tun season-ah MSN tia hminglem an phuahsak Messi, Suarez leh Neymar-te goal thun zat belhkhawm chu 100 a tling leh der tawh.

Enrique thukhawchang

Barcelona manager Luis Enrique chuan, "Tuna kan dinhmun hi kan duh-thu-sam a ni a, hetiang dinhmuna ding tur hian kan thawkrim hle a ni. La Liga-ah dinhmun duhawm takah ding mah ila champion tur chuan point tam tak hlawhchhuah tur a la awm a ni," tiin champion chiangah a insawi duh lo.

Torres a langsar

Valencia khelmualah Atletico Ma-drid an lenglut a, inkhel an zawh meuh chuan inkhelh hmaa sawi hlawh lo Fernando Torres-a'n sawi a hlawh a, Liverpool striker hlui hi inkhel thlak danglamtu a ni.

Inkhelh ṭan aṭanga minute 24-na lekah Atletico Madrid tan Antoine Griezmann-a'n an goal hmahruai a khung nghal a, tun season-a inelna hrang hranga a goal 22-na a ni. Goal an chhuah hnuah Valencia an harh zawk a, si an phur rei lo.

Goal an chhuah aṭanga minute 4-naah Denis Cheryshev chuan yard 15 vela hla aṭangin an si phurh sutna goal a khung. Valencia an phur sawt a, Cheryshev leh khel ṭha Paco Alcacer-te'n hun ṭha neih chhunzawm mah se an hun ṭha neih an chhawr ṭangkai thei lo.

Atletico manager Diego Simeone-a'n Torres a luhtir hnuah Atletico goal nawr a na sawt a, Chelsea striker hlui hian minute 72-naah an goal hnihna khungin Atletico player-te a chawk phur hle.

Valencia defender Santos chu minute 80-naah hnawhchhuah a ni a, Yannick Carrasco chuan minute nga hnuah Atle-tico goal thumna a khung zui bawk.

Hun tawp thlengin goal dang a lut tawh lo a, Atletico-in 3-1 in hnehna an chang.

Torres faktu Simeone

Atletico manager Simeone chuan, "Matias Kranevitter khan khel ṭha mah se tlarhmaa khel tur player chak ṭha leh speed ṭha, penalty box-a che tla tur Torres-te ang kha kan mamawh a ni. Fernando khan team tan a thawhhlawk a, a khel ṭha takzet a ni. Ka lawmna ber erawh Torres-a khel ṭha kha a ni," tiin Atletico tan a khelh laia captain lo ni tawh Spanish striker chu a fak.