Reds an vul, United an pul

Pathianni zan khan Liver-pool-in goal khat an phur hnuah an midfielder pawimawh James Milner hnawhchhuah ni mah se Selhurst Park-ah Crystal Palace 2-1 in an lehthal a, Manchester United erawh Hawthorns-ah goal la luh hmain Juan Mata-a'n red card hmuin West Brom lakah 1-0 in an tlawm.

Premier League-ah Louis van Gaal-a hoten point 47 hmuin Jurgen Klopp-a hote aiin point thumin hmu sang mah se Reds hian khelh khatin an khel tlem zawk. Sulhnu chhui leta club intluk tawk tak hi league lamah chungnung zawk an awm lo a, Ningani zan hian Europa League last 32-ah an inhmachhawn bawk ang.

Rilru Huaisen

Crystal Palace-in kuminah chak an la nei lo a, Liverpool lakah chak ngei tumin attacking football khel mah se goal hmaah an vannei tawk lo. Minute 48-naah an phu angin Palace-in Joe Ledley hmangin goal an khung a, minute 62-naah Reds midfielder James Milner hnawhchhuah a nih avangin mualneitu lam dinhmun a ṭha hle.

Amaherawhchu player 10-in Klopp-a naute an khel ṭha sawt a, Palace keeper Alex McCarthy chetsual an vanneih pui bawk. Minute 72-naah Palace keeper ball pet chhuak turin Roberto Firmino a pass a, Brazilian midfielder tan goal khung loh chu mualphona a nih tak avangin Hoffenheim midfielder hlui hian Liverpool fan-te lawmna tur a siam.

Injury time minute ruknaah Christian Benteke chuan sawisel theih takin penalty a hlawh a, Belgian striker hian chakna goal a khung.

Point thum hlawh chhuak Liverpool an vannei tih phat rual a ni lo a, an huaisenna leh tumruhna erawh fak loh theih loh a ni. Player 10-a khel Reds hian player-te'n minute 90 chhungin 113km an tlan a, Palace (111km) aiin 2km in an tlan tam zawk.

Crystal Palace boss Alan Pardew chuan, "Referee-in penalty an pe dawn a nih chuan 100% in an chian a ngai, thil thleng kha a muang thei ang bera kan en let chuan Benteke kha kan defender khupin a fuh keuh a, ani lah chu silaiin an kap emaw tih mai turin uar takin a tlu si. Hun tawpa penalty pekna tur a ni lo," tiin a lungawi lo hle.

Liverpool manager Jurgen Klopp chuan, "Si phur zawka kan ṭan chuan goal kan chhuah chhan kan hriat a ṭul lo. A pawimawh ber chu goal khung tura khelh phung thlak a ni. Risk kan la a, kan tifuh a, result ṭha tak a ni," tiin a sawi. German manager chuan penalty chu replay a en let hnuah referee thutlukna chu a dik ngei thu a sawi thung.

United hremtu Mata

Manchester United-in West Brom lakah bul an ṭan fuh tawk lo a, Spanish midfielder Mata-a'n minute 26-naah ṭul lo taka red card a hmuh bawk avangin hun tawp thlengin Van Gaal-a hote an insiamṭha lo.

Minute 66-naah Salomon Rondon-a'n United tlarhnung phui ṭhat loh remchangah lain substitute Sebastien Pocognoli cross ball chu penalty area-ah duh thala dawng sawngin a pet goal chiang hle.

Champions League khel pha tura point thum mamawh United hi Anthony Martial leh Marcus Rashford ten an chhanhim zo lo a, rawlthar duh-awm pahnih hi Baggies defender-te hmaah an thamral. West Brom-in an mual 'The Hawthorns'-ah a vawi khat nan Red Devils an hneh a, kum 32 hnua an vawi khat chakna a ni.

United manager Van Gaal chuan, "Referee khan dan bu ang chuan red card a pe tur a ni a, amaherawhchu referee hian an card pek tur player nungchang kha a hre tur a ni. Mata hian a player pui tih nat a duh ngai lo," tiin referee thutluknaah a lawm lo.

Dutch manager hian chak ngeina tur inkhela point an hmu lo chu pawi a tih thu inkhelh banah a sawi tel bawk.